इन्सेक गतिविधिहरू

इन्सेकद्धारा सञ्चालित “स्थानीय समुदायलाई सचेत पार्दै जिम्मेवार निकायलाई जवाफदेही बनाउने” इएलपी परियोजना अन्तरगत सन्दकपुर गाउँपालिकामा पुस १९ गते शिक्षा अधिकारका सवालमा शिक्षक, अभिभावक र विद्यार्थीबीच अन्तरक्रिया  कार्यक्रम सम्पन्न गरिएको छ ।

समस्या पहिचान तथा सरोकारवालाहरूको पहिचान र कार्ययोजना निमार्ण अन्र्तगत शिक्षाको अधिकारका सवालमा शिक्षक, अभिभावक र विद्यार्थीबीच अन्तरक्रिया कार्यक्रम सम्पन्न गरिएको हो ।

अन्तरक्रियामा सन्दकपुर गाउँपालिका कार्यपालिका सदस्य छत्र दियालीले इन्सेकले परियोजनमार्फत गाउँपालिकाभित्र शिक्षाका सवालमा समस्या पहिचान गरी त्यसको सम्बोधनका लागि स्थानीय सरकारलाई सहयोग गरेको बताउनु भयो । उहाँले सामुदायिक विद्यालयमा राज्यको लगानी प्रशस्त भएपनि नतिजा राम्रो नआउने भएका कारण धेरै अभिभावक निजी विद्यालयतर्फ आकर्षिक भएको बताउनु भयो ।

सन्दकपुर गाउँपालिका–१ का वडा सदस्य रहर राईले इन्सेकले परियोजनामार्फत शिक्षाका सवालहरू पहिचान गरीदिएका कारण अब गाउँपालिकाले ति समस्या सम्बोधन गर्नुपर्ने बताउनु भयो ।

गाउँपालिकाकी शिक्षा शाखा प्रमुख कल्पना ढकालले गाउँपालिकाभित्रका सामुदायिक विद्यालयमा छात्रामैत्री शौचालय नहुँदा छात्राहरूलाई समस्या हुने गरेको बताउनु भयो ।

गाउँपालिकाका प्रमुख प्रशासकीय अधिकृत महेश राईले इन्सेकले शिक्षाका मात्र नभएर स्वास्थ्य, खाद्य र आवास अधिकारका सवालमा गाउँपालिकामा परियोजना सञ्चालन गरेकाले संविधान प्रदत्त नागरिकको अधिकार रक्षाका लागि स्थानीय सरकारलाई सहज भएको बताउनु भयो ।

मानव अधिकार समूह सन्दकपुरका अध्यक्ष प्रकाश पराजुलीले इन्सेक परियोजनामार्फत मौलिक हकहरू नागरिकले पाए नपाएको विषयमा स्थानीय सरकारलाई जानकारी गराउने र त्यसको कार्यान्वयनका लागि खबरदारी गर्ने काम इन्सेकले गरीरहेको बताउनु भएको छ ।

अन्तरक्रियामा कक्षा १ देखि ८ सम्म स्थानिय पाठ्यक्रमको आवश्यकता, कम्प्युटर शिक्षकको आवश्यकता,छात्रछात्रामैत्री शौचालय ,खानेपानीका साधन अपाङ्गमैत्री हुनुपर्नेलगायतका समस्या पहिचान गरी सम्बोधनका लागि गाउँपालिकामा पेश गरेको इन्सेक इलाम जिल्ला सहजकर्ता नारद चापाँगाईले बताउनु भएको छ ।

बविता मैनाली