विद्यालयको अनुगमन, कृषि तथा पशु प्राविधिक व्यवस्थापन गर्ने प्रतिबद्धता

 

गुर्भाकोट नपामा रहेका सबै सामुदायिक विद्यालयहरूमा नगरपालिकाले नियमित अनुगमन तथा नगरपालिका ऐन तथा कार्यविधी बने लगत्तै सबै वडामा कृषि र पशुरोगका प्राविधिक व्यवस्थापन गर्ने प्रतिबद्धता व्यक्त गरिएको छ ।

साविक मालारानी गाविस तथा गुर्भाकोट नपा १ र २ वडा स्तरीय निगरानी समूह मालारानीले शिक्षासँग र साविक साहारे गाविस तथा गुर्भाकोट नपा ४, ५ र ९ वडा स्तरीय निगरानी समूह साहारेले कृषि तथा पशुसेवासँग सम्बन्धित समस्याको बारेमा बुझाएको ज्ञापन पत्र ग्रहण गर्दै गुर्भाकोट नपाका प्रमुख हस्त पुनले यस्तो प्रतिबद्धता व्यक्त गरेका हुन ।

प्रदेश नं ६ का जनताका समृद्धिका लागि पशुपालन, जडीबुटी र कृषि व्यवसायको विकल्प नरहेको उल्लेख गर्दै आगामी आर्थिक वर्षअघि नगरपालिका ऐन, तथा कार्यविधी तयार गरी गुर्भाकोट नपाका सामुदायिक विद्यालयहरूको गुणस्तरीय शिक्षाका लागि नियमित अनुगमन, कृषि र खाद्य अधिकार सुनिश्चितताका लागि सबै वडामा प्राविधिक व्यवस्थापन गरिने प्रमुख पुनले बताए ।

मानिस मालारानीले ०७४ माघ २५ गते स्थानीय स्तरमा पहिचान गरिएको शिक्षासँग सम्बन्धित नेरा आधारभुत तह रपट जनज्ञान भण्डार माविमा तारबारको लागि आवश्यक बनेट विनियोजन गर्नुपर्ने सहित १० बुँदे र मानिस साहारेले ०७४ माघ २६ गते प्रयाप्तमात्रामा कृषि तथा पशुसेवा प्राविधिकको व्यवस्थापन गरिनुपर्ने लगायतका १५ बुँदे ज्ञापनपत्र बुझाएका थिए ।

दुर्गा थापा