इन्सेक गतिविधिहरू

नागरिक समाज र सञ्चार जगतको सहकार्यको अभावमा विकासका जल्दाबल्दा समस्याहरू ओझेलमा परेको सरोकारवालाहरूले औँल्याएका छन् ।

इन्सेकको आयोजनामा जेठ १२ गते हेटौँडा उपमहानगरपालिका–२ स्थित न्युज क्लबमा आयोजना गरिएको ‘विकासका लागि नागरिक समाज र सञ्चार जगतको सहकार्य’ विषयक अन्तरक्रियामा विकासका हुने गरेको ढिलासुस्तीलाई रोक्नको लागि नागरिक समाज र सञ्चार जगतबीचको सहकार्य हुन नसकेको बताएका हुन् ।

इन्सेक नेपालको पूर्व जिल्ला प्रतिनिधि एवम् नेपाल पत्रकार महासङ्घ प्रदेश ३ का अध्यक्ष प्रताप विष्टले जनप्रतिनिधहरू स्थानीय तहसम्म आइपुग्दा विकासले फड्को मारेको बताए ।

यद्यपी विकासको काममा अझै पारदर्शी ढङ्गले जनप्रतिनिधि नलागेको भन्दै उनीहरूलाई जबाफदेही बनाउने कुरामा नागरिक समाज र सञ्चारकर्मीहरू एकसाथ लाग्नुपर्ने बताए ।

उनले समाजमा आएका लगानी पारदर्शी र जबाफदेही ढङ्गले काम गरिनुपर्ने बताए । कुनैपनि काममा नागरिकले औँला ठड्याउने भन्दा पनि पारदर्शी ढङ्गले काम गरिनुपर्ने बताए ।

गैसस महासङ्घकी रमिला सापकोटाले पछिल्लो समय जनप्रतिनिधि आइसकेपछि एकतर्फी ढङ्गले अघि बढिरहेको बताइन् ।

जनप्रतिनिधिहरू आफ्नो किसिमले विकासका काममा अघि बढ्ने तर त्यास्ता विकासका काममा नागरिक समाजलाई सहभागिता नगराउने समस्या बढेको बताइन् । यस्ता विषयलाई सञ्चारजगतले उठाउन समेत आग्रह गरिन ।

सञ्चारकर्मी एवम् अधिवक्ता बालकृष्ण अधिकारीले विकास निर्माणका योजनाहरूलाई छिटो छरितो रूपमा सम्पन्न गराउनको लागि नागरिक समाज र सञ्चार जगतबीचको सहकार्यको खाँचो रहेको बताए ।

‘नागरिक समाजले यस्ता विषयलाई प्राथमिकता दिएर खोज्ने र त्यसलाई सञ्चार जगतले आम समुदाय र सरोकारवाला निकायसम्म पु¥याउने भूमिका खेल्नु पर्छ ।’–उनले भने–‘समयमा विकास नहुनु भनेको देशकै क्षति हो । नागरिकले थप पीडा भोग्नु भएकोले सहकार्यले विकासको गतिलाई तिब्रता दिन सहयोग पुग्छ ।’

कार्यक्रममा नेपाल पत्रकार महासङ्घ मकवानपुरका अध्यक्ष हरि हुमागाईले नागरिक समाज र सञ्चारजगतको सहकार्य भएमा विकासले गति लिने, नागरिक समाजको गतिविधि र सरकारी निकायका गतिविधिहरू पारदर्शी हुने बताए ।

सञ्चारकर्मीहरूले यस्ता विषयमा कलम चलाउँदै आइरहेको भन्दै नागरिक समाजले समाजको समान विकासका लागि पूर्वाधारसँगै अन्य क्षेत्रहरूको पहिचान गरी दबाबमुलक भूमिका निभाउन आग्रह गरे ।

उनले नागरिक समाज र सञ्चारजगतको निगरानीले दिगो विकासमा टेवा पुगी उपभोक्ताहरू लाभान्वित हुने बताए । तीनै तहका सरकारले गरेका कामलाई प्रभाबकारी बनाउनका लागि नागरिक समाज र पत्रकारले पनि घच्घच्याउनुपर्ने बताए ।

कोक्यापका उपाध्यक्ष दिपेन्द्र ढकालले नागरिक संस्था र सञ्चार जगतको सहकार्यले समुदायप्रति जिम्मेवार बनाउन भूमिका खेल्नु पर्ने बताए ।

उनले नागरिक समाज र सञ्चार जगतको सहकार्यले आवाज विहीनहरूको मुद्दालाई बाहिर ल्याउने भएकोले समुदायनै यसबाट लाभान्वित हुने बताए ।

सञ्चारिका समूहकी प्रदेश ३ अध्यक्ष सरीता दाहालले नागरिक समाज र सञ्चार जगतले जातिगत विषय र सांस्कृतिक पक्षहरूमाथि पनि ध्यान दिनु पर्ने बताइन् ।

उनले स्थानीय सरकारका विकासका गतिविधिहरूमा पनि चासो राख्नु पर्ने बताइन् । उनले विकासलाई पूर्वाधार निर्माणको मात्रै परिभाषबाट नहेरी समाजका हरेक व्यत्तिको रहनसहन, सरसफाई र सन्तुलित खानामा सचेत हुनुपनि विकास हो भनी हेर्न र उनीहरूको दैनिक जीवनस्तर सुधारगर्न पनि दुवै पक्षले सहकार्य गरी अघि बढ्नुपर्ने बताइन् ।

अस्मिता नेपालकी कार्यक्रम संयोजक शान्ती कार्कीले सबै क्षेत्रको समान विकासका लागि नागरिक समाज र सञ्चारक्षेत्र सहकार्य गरी अघि बढ्न आवश्यक रहेको बताइन् ।

कार्यक्रममा सहभागीहरूले आगामी दिनमा नागरिक समाजमा आवद्ध र सञ्चार क्षेत्रमा आवद्धहरूले एकअर्काबीच अझै घनीभूत सहकार्य गरेर जानेमा प्रतिबद्धता जनाएका थिए ।

अहिलेसम्म रहेको खाडललाई पुर्दै एकअर्काका गतिविधि, सामाजिक विषयहरूलाई सहकार्य गरेर अघि बढ्न सहकार्यमा ध्यान दिने प्रतिबद्धता समेत जनाए ।

पुष्पराज अधिकारी