इन्सेक गतिविधिहरू

नागरिक समाज तथा सञ्चार जगतबिचको सहकार्यले स्थानीय तहको विकासमा ठूलो टेवा पुग्ने सरोकारवालाले बताएका छन् ।

अनौपचारिक क्षेत्र सेवा केन्द्र (इन्सेक) भक्तपुरले असार ११ गते भक्तपुरमा आयोजना गरेको विकासका लागि नागरिक समाज तथा सञ्चार जगतबिच सहकार्य विषयक अन्तरक्रिया कार्यक्रममा विकासमा सञ्चार जगतको भूमिका महत्वपुर्ण भएको सरोकारवालाहरूले बताएका हुन् ।

कार्यक्रममा जिल्ला समन्वय समितिका उपप्रमुख सरिता कुँवरले विकासको समन्वयको रूपमा रहेको जिल्ला समन्वय समिति नाम मात्रको भएको बताइन् ।

सूर्यविनायक नगरपालिकाकी उपप्रमुख जुना बस्नेतले विकास निर्माणको काम स्थानीय तहले गर्ने भएकाले सो कामको अनुमगन र पारदर्शिता बारेमा भने सञ्चार जगतले खोजी गर्नुपर्ने बताइन् ।

गैरसरकारी संस्था महासङ्घ भक्तपुरका अध्यक्ष सोम शर्मा (बजगाई)ले स्थानीय तहका काम कारबाही पारदर्शी हुनुपर्नेमा जोड दिए । सञ्चार जगत र नागरिक समाजबिच समन्वय हुनुपर्ने कुरामा उनले विशेष जोड दिए ।

नेपाल पत्रकार महासङ्घ भक्तपुरका अध्यक्ष पुष्करराज बुढाथोकीले विकासलाई सीप र प्रविधिसँग जोडेर लैजानुपर्ने आजको आवश्यकता रहेको चर्चा गर्दै सबै नेपालीलाई विकासको मार्गमा डोहोर्‍याउन सञ्चार जगतको भूमिका महत्वपूर्ण हुने बताए ।

नेपाल बार एशोसियएशन भक्तपुरका सचिव किरण न्यौपानेले विकासमा नागरिक समाजको जबाफदेहिता बढी हुने औँल्याउँदै स्थानीय तहमा अधिकार आएपनि प्रयोगमा नआउँदा जनताले अधिकार अनुसारको सेवा पाउन नसकेको बताए ।

सविना केसी