ललितपुरमा सार्वजनिक सुनुवाइ कार्यक्रम सम्पन्न

  ०७३ मङ्सिर २६ गते

अनौपचारिक क्षेत्र सेवा केन्द्र (इन्सेक)को आयोजनामा मङ्सिर २६ गते महालक्ष्मी नगरपालिकाको लुभुमा भूकम्पपीडितहरूको अवस्था र पुनर्निर्माण अभियानबारे सार्वजनिक सुनुवाइ कार्यक्रम सम्पन्न गरिएको छ ।

मानव अधिकारमैत्री वातावरणका लागि उतरदायित्व प्रवर्धन कार्यक्रम अन्तर्गत ललितपुरको महालक्ष्मी नगरपालिकाको संयुक्त वडा कार्यालय लुभुमा उक्त कार्यक्रम आयोजना गरिएको हो ।

विनाशकारी भूकम्पपछि भत्किएका घर पुनर्निर्माण गर्न नक्सा नभएको, सडक फराकिलो बनाउने मापदण्डभित्र भूकम्पले भत्काएका घर परेकोले झन् समस्यामा परेको, राहत मुख्य पीडितसम्म पुग्न नसकेको, सरकारी निरीक्षण प्रभावकारी नभएको, भूकम्पबाट जग्गाको नापी नाक्सा नहुँदा सरकारी अनुदानबाट वञ्चित हुनु परेको, सरकारले दिने भनेको अनुदानमा ढिलासुस्ती भएको, सरकारले खटाएको प्राविधिकहरू पीडितमैत्री र पारदर्शी नभएकोलगायतका विषयमा कार्यक्रमका सहभागीहरूले गुनासो गरेका थिए ।

कार्यक्रममा महालक्ष्मी नगरपालिका वडा नं ५, ६, ७ र ८ का संयुक्त वडा कार्यालय लुभुका प्रमुख जीतलाल श्रेष्ठले भूकम्पपीडितले उठाएका चार किसिमका समस्याहरू जग्गाधनी प्रमाण पुर्जा, गुठी जग्गामा बनाएको घरको समस्या, मोहीको जग्गामा बनाएको घर र एउटै पुर्जामा चार/पाँच जनाको फोटो टाँसले समस्या भएको गुनासोहरूलाई सम्बन्धित निकायसम्म पुर्‍याई समस्या समाधानका लागि आफूले सम्बन्धित निकायलाई सिफारिस गरी सकेकोले छिट्टै सही परीणाम आउने बताए ।

सरकारको 'एक घर एक क्षतिपूर्ति'को नीतिले परिवारमा झगडा सृजना भएको, लागत सङ्कलन छुटेको, पुर्जा भएकोलाई मात्र पुनर्निर्माणको लागि अनुदान दिने निर्णयको भूकम्प पीडित सुकुम्बासीमा परिणत हुनु परेको विषयले जटिलता पैदा गरेकोसमेत सहभागीहरूले बताएका छन् ।

रामकुमारी श्रेष्ठ