इन्सेक गतिविधिहरू

अनौपचारिक क्षेत्र सेवा केन्द्र (इन्सेक) ले भदौ १० गते ललितपुरको हरिसिद्धीमा सार्वजनिक सुनुवाइ कार्यक्रम सम्पन्न गरेको छ ।

मानव अधिकारमैत्री वातावरणका लागि उतरदायित्व प्रवर्धन कार्यक्रम अन्तर्गत भूकम्प पीडितहरूको अवस्था र पुनर्निर्माण अभियानका बारेमा सार्वजनिक सुनुवाइ कार्यक्रम आयोजना गरिएको हो ।

कार्यक्रमका सहभागीहरुले विनासकारी भूकम्पपछि बाँडिएको राहत मुख्य पीडितसम्म पुग्न नसकेको, सरकारी निरिक्षण प्रभावकारी नभएको, भूकम्पपीडित कार्डमा विभेद गरिएको, जग्गाको नापनक्सा नहुँदा सरकारी अनुदानबाट वञ्चित हुनु परेको, विभिन्न सङ्घसंस्थाले बाँडेको राहतमा नाम टिपेर लगे पनि समान वितरण नगरेकोलगायतका गुनासो गरेका थिए ।

भूकम्प पीडितलाई दिने भनेको राहतको बारे पर्याप्त जानकारी नपाएको, अनुगमन प्रभावकारी नभएको, सरकारले नापनक्साको र सडकको मापदण्डको विषयले आफूहरू झन् समस्यामा पर्ने बताउँदै सरकारले दिने भनेको रकम एकमुष्ठ रूपमा दिनुपर्ने कार्यक्रममा सहभागी पीडितहरूले माग गरेका छन् ।

कार्यक्रममा ललितपुरको ललितपुर उमनपा वडा नं २९ र ३० संयुक्त वडा कार्यालयका सचिव सानुबावु सिलवालले पीडितहरूले उठाएका गुनासोहरूलाई सम्बन्धित निकायसम्म पुर्‍याई समस्या समाधानका लागि आफूले पहलकदमी लिएर कामगर्ने बताएका थिए ।

इन्सेक मध्यमाञ्चल क्षेत्रीय कार्यालयका प्रलेख अधिकृत राजु पासवानले एक महिनाभित्र लागत सङ्कलन गर्ने कार्यका लागि र लाल पुर्जा नभएका पीडितहरूसँग अनुदान सम्झौतामा सहजीकरणका लागि वडा कार्यालयले नेतृत्वदायी भूमिका निर्वाह गर्नुपर्ने बताए ।