इन्सेक गतिविधिहरू

राज्यले भूकम्प पीडितलाई राहातको नाममा झुक्याउने गरेको रामेछापको भटौलीका सर्वसाधारणले  एक कार्यक्रममा आरोप लगाएका छन् ।

मन्थली नगरपालिका-१३ भटौलीको ठेडीखोलामा अनौपचारिक क्षेत्र सेव केन्द्र (इन्सेक)ले भदौ ९ गते अयोजना गरेको भूकम्प पछिको पुनर्निर्माणको अवस्था विषयक सार्वजनिक सुनुवाइ कार्यक्रमका सहभागिहरूले यस्तो आरोप लगाएका हुन् ।

कार्यक्रममा बोल्दै मन्थली नपा-१३ का वडा नागरिक मञ्चका संयोजक सुदर्शन प्रर्साईँले सरकारले भूकम्प पीडितहरूको लागि उपलब्ध गराउने भनेको रकम उपलब्ध नगराएको कारण पुनर्निर्माणको कुनै पनि काम अघि नबढेको आरोप लगाए । उनले नागरिकका समस्या अहिले पनि जस्ताको तस्तै भएको बताए ।

नेपाली काँग्रेका प्रतिनिधि भूवनहरि प्रर्साईँले राज्यले प्रक्रियाको नाममा नागरिकलाई अल्मल्याएर राखेको गुनासो गरे । उनले अहिले पनि कतिपय प्रभावितले राज्यको तर्फबाट कुनै सहयोग नपाएकोले गुनासो सुनुवाइ हुन्छ भन्ने कुरामा नागरिक विश्वस्त नरहेको बताए ।

एमालेका वडा प्रतिनिधि कमलबहादुर खड्काले घर बनाउने बेलामा ढुङ्गा र बालुवासमेत रोकेर राज्यले पीडितलाई थप पीडा दिएको बताए । नेकपा माओवादी केन्द्रका श्रीबहादुर माझीले राज्यले नागरिकको सोझोपनको फाइदा उठाएको आरोप लगाए । उनले विदेशीले दिएको रकमसमेत नेपाल सरकारले नागरिकको हातमा पुर्‍याउन नसकेको बताए ।

राप्रपा नेपालका नारायण खत्रीले भूकम्प गएको डेढवर्ष बित्दा पनि सरकारको सहयोग नआएकोले नगारिक निराश भएको बताए । राप्रपाका श्रीवंश कँडेलले नागरिकको अहिले पनि पाल मूनिको बास भएको बताउँदै त्यस्ता नागरिक ज्वरो र टाइफाइडबाट पीडित भएको बताए ।

मन्थली नगरपालिका वडा नं १३ र १४ का प्राविधिक मखौरे माझीले दुई ओटा वडामा कुल १ हजार १ सय ९७ ओटा भूकम्प पीडित परिचयपत्र बनेकामा निजी आवास निर्माणको लागि ९ सय २१ जनाको नाम प्रकाशित भएको बताए । त्यस मध्ये ९ सय जनसँग सम्झौता भएको उनले जनाकारी दिए । यसै गरी १ सय २५ जनाले आफ्नो नाम छुटेको गुनासो गरेको उनले जानकारी दिए । उनले अब १५ दिन भित्र सम्झौता गर्नेहरूको खातामा रकम आइपुग्ने पनि बताए ।

कार्यक्रममा बोल्दै सामुदायिक वन उपभोक्ता महासङ्घ रामेछापका अध्यक्ष दुर्गाबहादुर श्रेष्ठले पीडितहरूलाई छुट मुल्यमा काठ उपलब्ध गराउन सामुदायिक वन उपभोक्ता महासङ्घले सहयोग गर्ने बताए ।

कार्यक्रममा ९४ जना पुरुष र २८ जना महिला गरी १ सय २२ जनाको सहभागिता रहेको थियो ।