इन्सेक गतिविधिहरू

मोरङमा नेपाल मानव अधिकार वर्षपुस्तक-२०१८ का लागि समेटिएको घटनाहरूको प्रकाशन पूर्व  वार्षिक समीक्षा कार्यक्रममा १ सय २४ ओटा घटना सार्वजनिक गरिएको छ ।

पुस १२ गते विराटनगरमा आयोजित कार्यक्रममा वर्षपुस्तकका लागि १ जनवरी २०१७ देखि डिसेम्बर महिनासम्म समेटिएका घटनाहरूको समीक्षा गरिएको हो ।

सो अवधिमा मोरङमा १ सय २४ ओटा घटना अभिलेख गरिएकोमा १ सय ३० जना पीडित भएको इन्सेक मोरङ जिल्ला प्रतिनिधि इन्दिरा भट्टराईले बताइन् । जसमा सबैभन्दा बढी बलात्कारका घटना ५६ ओटा, बलात्कार प्रयासका २१ ओटा, घरेलु हिंसा २१ ओटा र बहुविवाहका १३ ओटा रहेका छन् ।

त्यसैगरी कुटपिटका तीन, हत्याका चार, मानव बेचबिखनका दुई, दुर्व्यवहार एउटा घटना अभिलेख भएको छ । बलात्कारका ५६ घटनामा, ४३ जना बालबालिका र १३ जना महिला, त्यसैगरी बलात्कार प्रयासका २१ घटनामा आठ जना बालिका र १३ जना महिला रहेका छन् ।

कार्यक्रममा सहभागी सरोकारवालाहरूले अहिले घरेलु हिंसा, बलात्कार जतिकै जटिल रूपमा बालविवाह देखिएको भन्दै यसको न्यूनीकरणका लागि लाग्न आवश्यक भएको बताए । सो अवसरमा जिल्ला प्रहरी कार्यालयकी इन्स्पेक्टर जमुना बस्नेतले महिला विरूद्ध हुने हिंसाका घटना सूचनाका कारण धेरै आउन थाले पनि घरेलु हिंसामा भने कारबाही गर्न नसकेको बताइन् ।

मोरङमा बालिका बलात्कारका घटना धेरै भएको तथ्याङ्कले देखाएकोले यसका लागि सबै सरोकारवालाहरूले सचेतना फैलाउन जरूरी रहेको बताइन् । त्यसैगरी राष्ट्रिय मानव अधिकार आयोग क्षेत्रीय कार्यालय विराटनगरकी प्रमुख मञ्जु खतिवडाले हिंसा पीडित महिलाहरूले आर्थिक र भौतिक सुरक्षाका कारण कारबाहीको लागि खुलेर आउन नसकेको बताइन् ।

इन्सेक क्षेत्रीय कार्यालय विराटनगरका संयोजक सोमराज थापाले पीडितलाई न्याय दिने र पिडकलाई कारबाही गर्न र हाम्रो समाज कता जाँदैछ भनेर चित्रण गर्न वर्षपुस्तकले मद्धत गर्ने बताए ।

अनलाइन डेस्क