इन्सेक गतिविधिहरू

तीनै तहको सरकारको प्रतिबद्धता, मानव बेचविखन विरुद्ध सबैको ऐक्यबद्धता भन्ने मुल नाराका साथ मानव बेचविखन विरुद्ध १८ औँ राष्ट्रिय दिवसको अवसरमा ०८१ भदौ २० गते विहान जकपुरधाममा प्रभातफेरी र साँझ दिप प्रज्वलन कार्यक्रमको आयोजना गरी सम्पन्न गरिएको छ ।

अनौपचारिक क्षेत्र सेवा केन्द्र (इन्सेक) मधेस प्रदेश, जनकपुरधाम उपमहानगरपालिका, जिल्ला प्रहरी कार्यालय धनुषा, माइती नेपाल, शान्ति पुर्नस्थाप्ना केन्द्र, किन नेपाल र सेफ नेपालको संयुक्त आयोजनामा भदौ २० गते विहान प्रभातफेरीको आयोजना गरिएको हो । प्रभातफेरी जनकपुरधामस्थित रेल वे स्टेशनमा निकालिएको थियो ।

उक्त प्रभातफेरी कार्यक्रममा जनकपुरधाम उपमहानगरपालिकाका मेयर मनोज साहले मानव बेचविखन विरुद्ध सबै एक जुट भएर लाग्नु पर्ने उल्लेख गर्नु हुँदै मानव बेचविखन विरुद्ध ग्रामिण तहसम्म अभियान चलाउनु पर्ने बताउनु भयो । छिमेकी मुलुक भारत र खाडि मुलुकमा लगी बेचबिखन गर्ने गरिएको हुँदा संकाशपद नाकामा निगरानीलाई कडाई गर्नु पर्नेमा वहाँले जोड दिनु भयो ।

इन्सेक मधेस प्रदेश संयोजक राजु पासवानले इन्सेकको अभिलेख अनुसार सन् २०२३ मा अर्थात गएको वर्ष मधेस प्रदेशमा १५ जना महिला तथा बालबालिका बेचविखन घटनामा पीडित भए भने ५ जना महिला बेचबिखन प्रयास घटनामा पीडित भएको बताउनु भयो ।

मानव बेचविखन मानव सभ्यताको कलंकको रुपमा रहेको वहाँले बताउनु भयो । समयको अन्तरालसँगै मानव बेचबिखनको स्वरुप र आयाम परिवर्तन हुँदै आएको वहाँले उल्लेख गर्नु हुँदै विशेषतः महिला, बालबालिका तथा पुरुषहरु यस घटनामा पीडित हुने गरेको बताउनु भयो ।

मधेस प्रदेशका आठ ओटै जिल्लामा रहेको खुला भारतीय सीमा नाका प्रयोग गरी बेचविखनका घटना हुने गरेको र अस्पतालहरुमा समेत मानव अंगहरुको तस्करी हुने गरेको हुँदा यसमा सम्बन्धित निकाय तथा सरोकारवालाको ध्यान जान आवश्यक रहेको इन्सेक मधेस प्रदेश संयोजक पासवानले बताउनु भयो ।

यसैगरी मानव बेचविखन विरुद्धको १८ औँ दिवसको अवसरमा जनकपुरधाम उपमहानगरपालिका, इन्सेक, माइती नेपाल लगायतका संघ संस्थाहरुको संयुक्त आयोजनामा जनकपुरधाम स्थित जनक चौकमा दिप प्रज्वलन कार्यक्रमको आयोजना गरिएको छ । कार्यक्रममा जनकपुरधाम उपमहानगरपालिकाका उपमेयर किशोरी साहलगायत विभिन्न संघ संस्थाका प्रतिनिधिहरुको सहभागिता रहेको थियो ।

इन्सक मधेस प्रदेश कार्यालय, जनकपुरधाम