इन्सेक गतिविधिहरू

इच्छाकामना गाउँपाालिका स्तरीय मानव अधिकार समूहका लागि आयोजित दुई दिने कार्यक्रम ०७९ चैत १४ गते समापन भएको छ ।

तालिमको समापन कार्यक्रमका प्रमुख अतिथि गाउँपालिका उपाध्यक्ष माया सिलवालले मानव अधिकार मैत्री पालिका बनाउनका लागि आवश्यक नीति नियम बनाउने प्रतिवद्धता व्यक्त गर्नु भयो ।

उहाँले यसका लागि मानव अधिकार समूहबाट पनि स्थानीय ठाउँका समस्या र आवश्यकता पालिकालाई उपलब्ध गराउन आग्रह गर्नु भयो ।

हाम्रा पालिकाका बालबालिकालाई हाम्रै पालिकामा शिक्षा र स्वास्थ्यको व्यवस्था गर्न हामी सक्षम छौँ । तर आन्तरिक सर्वेक्षणले पालिका भित्रका सात प्रतिशत बालबालिका पालिका बाहिर गएको पाइएकोले यसमा हामीले गम्भीर भएर समीक्षा गरेका छौँ । खान लाउन नपाउने अवस्था भए पालिकामै सम्पर्क राख्न र बाहिर नपठाउन समेत आग्रह गर्नु भयो ।

उपाध्यक्ष सिलवालले इन्सेकले मानव अधिकार समूह गठन गरेर जनता र हामी बीच पुलको काम गरेकोमा खुशि व्यक्त गर्दै नागरिकका समस्या उठाएर समूहले दिएको ज्ञापन पत्र बुझाएको विषयलाई सकरात्मक लिँदै स्थानीय स्तरका समस्या बुझ्ने मौका पाएको बताउनु भयो ।

यसै गरी वडा नं ४ का वडा अध्यक्ष रुद्र उप्रेतिले नागरिकलाई सर्वसूलभ रुपमा सेवा प्रदान गर्ने कार्यमा आफू सदैव क्रियासील रहेको बताउनु भयो ।

उहाँले सेवाग्राहीका समस्या समाधानका लागि पालिकासँग सहकार्य गरेर अगाडि बढ्ने बताउनु भयो ।

कार्यक्रममा इन्सेकका बागमती प्रदेश संयोजक गणेश भण्डारीले मानव अधिकार समूहका सदस्यलाई दिइएको यस तालिमले स्थानीय स्तरमा हुने मानव अधिकार उल्लङ्घन तथा ज्यादतिका घटनाको पहिचान गर्न सहज हुने बताउनु भयो ।

यसले गर्दा समूहका सदस्यमा मानव अधिकारका विषयमा साझा धारणा बन्ने हुँदा आगामी दिनमा काम गर्न र विषयको उठान गर्नलाई समूहकका सदस्यहरू सक्षम हुने धारणा राख्नु भयो ।

कार्यक्रमका अध्यक्षता गर्नु भएकी मानव अधिकार समूहका संयोजक पार्वती गिरीले तालिममा सिकेका कुरा आफूमा सिमित नराखि व्यवहारमा उतार्ने प्रतिवद्धता जनाउनु भयो ।

दिपेन्द्र अधिकारी