इन्सेक गतिविधिहरू

अनौपचारिक क्षेत्र सेवा केन्द्र (इन्सेक)को आयोजनामा डाक्नेश्वरी नगरपालिका र शम्भुनाथ नगरपालिकाको मानव अधिकार समूहद्वारा सम्पन्न कार्यको समीक्षा तथा आगामी कार्ययोजना र रणनीतिक सम्बन्धमा ०८१ असार २४ गते बैठक बसेको छ ।

शम्भुनाथ नगरपालिकास्थित वडा नम्बर १२ को सभाकक्षमा सम्पन्न बैठकले शम्भुनाथ नगरपालिका र डाक्नेश्वरी नगरपालिकाको मानव अधिकार समूहबाट शिक्षा, स्वास्थ्य, वातावरण, महिला हिंसा र सबै प्रकारका समस्याहरूबारे समीक्षा गर्दै आगामी कार्ययोजना र रणनीतिक योजना सम्बन्धमा निर्णय गरेको छ ।

दुबै नगरपालिकाभित्र देखिएका विविध समस्याहरू समाधान गर्ने, विगतमा बनेका कार्ययोजना सम्पन्न गर्ने निर्णय गरिएको इन्सेकका सहजकर्ता अजय परियारले जानकारी दिनुभयो । महिला हिंसाबाट पीडित र न्यायबाट वञ्चित व्यक्तिहरूको पहिचान गरी नगर प्रमुख र महिला तथा बालबालिका शाखा र सम्बन्धित शाखालाई ध्यानाकर्षण गरी समाधानका लागि पहल गरिने शम्भुनाथ नगरपालिकाको मानव अधिकार समूहका अध्यक्ष पुलकित भगतले बताउनु भयो । भगतका अनुसार अधिकारलाई सुनिश्चित र संरक्षण गर्न सबै खाले हिंसा विरूद्ध अभियान सञ्चालन गरिनेछ ।

डाक्नेश्वरी र शम्भुनाथ नगरपालिकाको मानव अधिकार समूहले स्थानीय तहको समस्या पहिचान तथा कार्ययोजना निर्माण गर्दै समस्याहरूबारे नगर प्रमुख र सम्बन्धित निकायलाई ध्यानाकर्षण गराउने छ । यस्तै बैठकले वडा स्तरीय मानव अधिकार समूह गठन गर्ने, मानव अधिकार क्षेत्रका लागि बजेट विनियोजन गर्न पालिकाहरूमा ध्यानाकर्षण गर्ने निर्णय गरिएको छ ।

बैठकमा वडा अध्यक्ष संजय साहले मानव अधिकार समूहको कामको प्रशंसा गर्नुहुँदै मानव अधिकारको संरक्षण, सम्बद्र्धनका लागि पहल गरिरहनु पर्ने बताउनु भयो । न्यायका लागि मानव अधिकार समूहलाई सदैव सहयोग गर्ने उहाँले प्रतिबद्धता व्यक्त गर्नुभयो ।

प्रदेश मानव अधिकार समूहकी अध्यक्ष देबीमाया भट्टराईले मानव अधिकारको संरक्षण र पहल गर्नु हामी सबैको कर्तव्य भएकाले त्यसैगरी कार्ययोजना बनाइएको बताउनु भयो । अधिकारबाट कोही पनि वञ्चित नहुन भनेर बालमैत्री बिद्यालय, स्वास्थ्य सेवामा पहुँच, वातावरणको रक्षा हुने गरी समीक्षा तथा आगामी कार्ययोजना र रणनीति तयार गरिएको उहाँले बताउनु भयो । मानव अधिकार समूहद्वारा स्थानीय तहसँग समन्वय गरी शिक्षा, स्वास्थ्य, लैंङ्गिक हिंसा विरूद्ध, वातावरणको अधिकार तथा जातीय विभेदसम्बन्धी सचेतनामूलक कार्यक्रम गरिरहेको, मानव अधिकारको रक्षाका लागि काम गरिरहेको दुबै पालिकाको समूह र प्रदेश मानवअधिकार समूहले काम गरिरहेको भट्टराईले बताउनुभयो ।

डाक्नेश्वरी नगरपालिकाको मानव अधिकार समूहका अध्यक्ष रामचन्द्र मण्डलले समूहको पहलमा नगर सभाबाट विकासको योजनासँगै बाल अधिकार र मानव अधिकार संरक्षण हेतु लैङ्गिक हिंसा विरुद्धको कार्यक्रमको लागि बजेट विनियोजन भएको जानकारी दिनुभयो ।

शम्भुनाथ नगरपालिका सदस्य रहनु भएका शिवशंकर रामले मानव अधिकार समूहको पहलमा नगरपालिकाले बाल विवाह मुक्त नगर बनाउन बजेट विनियोजन गरेको तथा विभेद र छुवाछुत विरूद्ध कार्यक्रम पालिकाबाट गर्न लागेको जानकारी दिनुभयो ।

वडा अध्यक्ष संजय साहको अध्यक्षता र इन्सेक सहजकर्ता परियारले सहजिकरण गर्नुभएको कार्यक्रममा डाक्नेश्वरी र शम्भुनाथ नगरपालिकाको मानव अधिकार समूह, पालिका सदस्यहरू, प्रदेश मानव अधिकार समूहका पदाधिकारीहरूको सहभागिता रहेको थियो ।

मनोहरकुमार पोखरेल