इन्सेक गतिविधिहरू

अनौपचारिक क्षेत्र सेवा केन्द्र (इन्सेक) मधेस प्रदेशद्वारा गठित डाक्नेश्वरी नगरपालिका वडा नं. १० को मानव अधिकार समूहले ०८१ वैशाख १४ गते कार्ययोजना निर्माण र समस्या पहिचान बैठक सम्पन्न गरेको छ ।

वडा नं. १० स्थित राम टोलमा भएको वैठकले वडा र विद्यालयहरूको सरसफाई कार्यक्रम, बृक्षारोपण, लैङ्गिक हिंसा विरुद्धको अभियान सञ्चालन सम्बन्धमा सर्वसम्मतिले कार्ययोजना बनाएको वडा मानव अधिकार समूहका अध्यक्ष बौएलाल रजकले जानकारी दिनुभयो ।

अध्यक्ष रजकका अनुसार स्वर्गीय मुनरो मोची रामकी सुस्त मनस्थितिकी छोरी ४५ वर्षीया धनेश्वरी कुमारी राम र स्वर्गीय सुलेमान अन्सारीको बोल्न नसक्ने अपाङ्ता भएका छोरा १८ वर्षीय जावेद अन्सारीको नागरिकता नबनेको समस्या पनि पहिचान गरी समाधानका लागि स्थानीय तहमा ध्यानाकर्षण पत्र बुझाउने निर्णय गरिएको छ । राम र अन्सारीको नागरिकता समस्याका विषयमा वडा स्तरीय मानव अधिकार समूहलाई निवेदन आएको थियो ।

वैठकलाई सम्बोधन गर्नुहुँदै अध्यक्ष रजकले आफ्नो अधिकारको बारेमा तथा समस्या सम्बोधन हुने निकाय र प्रकृयाका बारेमा जानकारी राख्न जरुरी रहेको बताउनु भयो । इन्सेकद्वारा गठित मानव अधिकार समूह सदैव राज्यबाट प्राप्त हक अधिकारबारे चेतना जागृत गराउँदै पीडितहरूलाई न्यायको पहुँचसम्म पु¥याउन पहल गरिरहने रजकले बताउनु भयो ।

समाज शिक्षाबाट वञ्चित रहेकोले नै विभिन्न प्रकारको हिंसा सहन बाध्य हुनुपरेको भन्नुहुँदै नगर मानव अधिकार समूहका कोषाध्यक्ष मुसा अन्सारीले सकारात्मक परिवर्तनका लागि आ–आफ्नो छोरा छोरीलाई शिक्षा अनिवार्य दिनुपर्ने बताउनु भयो । शिक्षामा समान अवसर दिएको र विद्यालय भर्ना अभियान सञ्चालन भइरहेका बेला छोरी र छोरालाई विद्यालय भर्ना गरी उज्जवल भविष्य बनाउन उहाँले अपील समेत गर्नुभयो ।

रजकको अध्यक्षता भएको बैठकमा इन्सेक सहजकर्ता अजय परीयारले इन्सेकको परियोजनाले गर्ने काम र उद्देश्यका बारेमा प्रकाश पार्नु भयो ।

मनोहरकुमार पोखरेल