इन्सेक गतिविधिहरू

अनौपचारिक क्षेत्र सेवा केन्द्र (इन्सेक) द्वारा गठित जानकी गाउँपालिका स्तरीय मानव अधिकार समूहको कार्ययोजना बैठक ०८१ असोज १४ गते नेपालगञ्जमा सम्पन्न भएको छ ।

मानव अधिकार समूहका अध्यक्ष मोहमद जाहिर शेखले मानव अधिकारको सवालमा सचेतना तथा सरोकारवाला निकायलाई जवाफदेही बनाउन पहल गरिरहेको बताउनु भयो । उहाँले आगामी दिनमा थप कार्य गर्न योजना तय गरिने उल्लेख गर्नुभयो ।

समूहले आगामी पुस महिनासम्म स्वास्थ्य संस्थाको अनुगमन, विद्यालय अनुगमन, ६ नं. वडा पिप्रहवा नहरमा फालिएको फोहोर व्यवस्थापनका लागि मागदावी गर्ने, वडा स्तरको मानव अधिकार समूहको बैठक बस्ने, समूहको सामाजिक परीक्षण, कर चुक्ता गरी स्थानीय तहमा समूह नवीकरण गर्ने र बाल अधिकार परिचालन कोष हस्तान्तरण गर्ने कार्य योजना तय गरेको सहजकर्ता लक्ष्मी थारुले बताउनु भयो ।

बैठकमा इन्सेक लुम्बिनी प्रदेश कार्यालयका कार्यक्रम अधिकृत सरस्वती मल्लले मानव अधिकार समूहले उठाएका शिक्षा, स्वास्थ्य, वातावरण अधिकार र लैङ्गिक विभेदका सवालमा स्थानीय तहमा सुनुवाई हुँदै आएकोले थप कानुनी प्रावधान र नागरिकको अधिकारलाई समेटर वकालत गर्नुपर्ने सुझाव दिनुभयो । उक्त समूहले स्थानीय तहमा शिक्षा, स्वास्थ्य, वातावरण अधिकार र लैङ्गिक विभेद विरुद्धमा वकालत गर्दै आइरहेको छ ।

ध्रुबराज शर्मा