मानव अधिकार समूहका अध्यक्ष र बाल अधिकार सचेतना समूहका उपाध्यक्ष सम्मानित

  ०८० फागुन १५ गते

Photo 20240227 Saptari 1
अनौपचारिक क्षेत्र सेवा केन्द्र (इन्सेक) को आयोजनामा गठित मधेश प्रदेश स्तरीय मानव अधिकार समूहको अध्यक्षमा देबीमाया भट्टराई र बाल अधिकार सचेतना समूहको उपाध्यक्षमा मनिषाकुमारी रजक चयन हुनुभएकोमा डाक्नेश्वरी नगरपालिकामा ०८० फागुन १३ गते सम्मान गरिएको छ ।

डाक्नेश्वरी नगरपालिकाले एक कार्यक्रमको आयोजना गरी भट्टराईर र रजकलाई सम्मान पत्र हस्तान्तरण समेत गरेको जिल्ला सहजकर्ता अजय परियारले बताउनु भयो । धनुषाको मिथिला नगरपालिका–१० स्थित बौवाहोटलमा माघ २४ गते भएको समूहको पुर्नगठनमा शम्भुनाथ नगरपालिका मानव अधिकार समूहकी नगर उपाध्यक्ष भट्टराई मधेस प्रदेश मानव अधिकार समूहको अध्यक्ष पदमा चयन हुनुभएको थियो ।

त्यस्तै, माघ २६ गते गठन भएको प्रदेश स्तरीय बाल अधिकार सचेतना समूहको उपाध्यक्षमा डाक्नेश्वरी नगरपालिका–१० स्थित हिरा फेकनी माध्यमिक विद्यालयकी रजक चयन हुनुभएको थियो । उहाँ आफ्नो विद्यालयको बाल अधिकार सचेतना समूहकी उपाध्यक्ष हुनुहुन्छ ।

कार्यक्रमका प्रमुख अतिथि डाक्नेश्वरी नगरपालिकाका नगर प्रमुख रामलखन मलाहाले सप्तरीको छोरी बहिनीहरु प्रदेश स्तरीय समूहको अध्यक्ष र उपाध्यक्षमा चयन हुनु गौरवको विषय भएको बताउनु भयो । स्थानीय सरकारबाट मात्र सम्भब नहुने स्थानीय अधिकारलाई सुनिश्चित गर्नप्रदेश स्तरसम्म अध्यक्ष, उपाध्यक्षले गहन बहस गरी ध्यानाकर्षण गराउने कुरामा उहाँले विश्वास व्यक्त गर्नु भयो ।

डाक्नेश्वरी नगरपालिकाको मानव अधिकार समूहका अध्यक्ष रामचन्द्र मण्डलले मानव अधिकार क्षेत्र र न्यायको पहलमाथपउर्जा मिलेको बताउनु भयो । चयन हुनुभएका अध्यक्ष, उपाध्यक्षलाई शुभकामना दिनुहुँदै उहाँले नगरको कार्ययोजना प्रदेश स्तरमा लगेर समाधानको पहल गरिदा आत्मबल र आन्तरिक क्षमता बढने बताउनु भयो।

मानव अधिकार समूहकी प्रदेश अध्यक्ष भट्टराईले नगरदेखि प्रदेशसम्मको विश्वासले जिम्मेवारी बोध भएको र आत्मबल बढेको बताउनु भयो । मानव सेवाको कार्यमा सदैव साथ सहयोग रहने विश्वास सहितको प्रतिबद्धता उहाँले व्यक्त गर्नु भयो ।

प्रदेश बाल अधिकार सचेतना समूहकी उपाध्यक्ष रजकले बालबालिकाहरूले सक्रिय सहभागिता जनाउन र मनको कुरा राख्न पाउने अवसरका लागि धन्यवाद व्यक्त गर्नु भयो । आफूमाथिको जिम्मेवारी र सम्मान सबै बालबालिकाहरू प्रतिको विश्वास भएकोले समाजका बिकृतीविरुद्ध खुलेर बोल्ने साहस बढेको बताउनु भयो ।

 Photo 20240227 Saptari

मनोहरकुमार पोखरेल