इन्सेक गतिविधिहरू

अनौपचारीक क्षेत्र सेवा केन्द्र (इन्सेक)ले राक्सिराङ गाउँपालिकमा गठन गरेको पालिकास्तरीय मानव अधिकार समूको समस्या पहिचान र समूहको कार्ययोजना बैठक मानव अधिकार समूहको संयोजक चन्द्रमान प्रजाको अध्यक्षतामा ०८१ जेठ १४ गते चैनपुरमा सम्पन्न भएको छ ।
राक्सिराङ गाउँपालिका वडा नं ५ मा आयोजना गरीएको कार्यक्रममा मानव अधिकार समूहका पदाधिकारीहरू सहभागिता रहेको थियो । यस कार्यक्रममा स्थानीय तहमा मानव अधिकार समूहहरूको समस्या, आगामि कार्ययोजना, यहाँ भएका समस्याहरू र सुधार ल्याउनुपर्ने पक्षहरू लगायत विविध विषयमा छलफल भएको थियो ।
छलफलमा राक्सिराङ गाउँपालिका भित्र रहेका समस्याहरूको पहिचान गर्दा पालिका भित्र विद्यालयमा फोहोर व्यवस्थापन नभएको, कुनै विद्यालयमा भवनको अभाव, विद्यालयमा शिक्षकको अभाव, विद्यालयमा विद्यालय नर्सको आवश्यकता, क्रसर उद्योगको कारणले वातावरणीय असर जस्ता विषयमा बैठकमा छलफल गरिएको थियो ।
यस्तै गरी पालिका भित्र फोहोरको व्यवस्थापन नभएको कारण प्रदुषण बढेको, जङ्गल क्षेत्रको विनास हुने गरेको तथा फोहोर व्यवस्थापन हुन नसकेको जस्ता विषयहरू पहिचान भएका थिए ।
अहिलेको समयमा आगलागिले गर्दा धुवा धुलोका कारण मानव स्वास्थ्यमा प्रतिकुल असर, प्रदुषण साथै वातावरण प्रदुषण भएको समूहका अध्यक्ष चन्द्रमान प्रजाले बताउनु भयो ।
साथै मानव अधिकार समूहको बैठकमा उठेका समस्याहरूलाइ लिएर मानव अधिकार समूहले गाउँपालिका समक्ष ज्ञापनपत्र र आगामी आर्थिक वर्ष २०८१/२०८२ को लागि मानव अधिकार समूहले गाउँपालिका समक्ष प्रतिवेदन पेश गर्ने निर्णय समूहले गरेको छ ।

पुष्पराज अधिकारी