इन्सेक गतिविधिहरू

मानव अधिकार सञ्जाल गोरखाले आगामी जेठ ३१ गते तय भएको स्थानीय तहको निकायको निर्वाचनको तयारीबारे मुख्य निर्वाचन अधिकृत, प्रमुख जिल्ला अधिकारी र प्रहरी प्रमुखसँग छलफल गरेको छ । सञ्जालका अध्यक्ष यदु अधिकारीको नेतृत्वको टोलीले वैशाख १७ गते कार्यलयमै पुगेर निर्वाचनको तयारीको विषयमा छलफल गरेको हो । टोलीले निर्वाचनको तयारी, शान्ति सुरक्षाको अवस्था, आचार संहिता पालनामा प्रशासनले देखाएको तदारूकतालगायतका विषयमा छलफल गरेको अध्यक्ष हो ।

मुख्य निर्वाचन अधिकृत बसन्तराज पौडेलले निर्वाचन निष्पक्ष बनाउन आफूहरूले दलहरूसँग बारम्बार छलफल गरेको बताए । हालसम्म निर्वाचनमा बालबालिकाको प्रयोग तथा निर्वाचन आचार संहिता उल्लङ्घनको घटनाको उजुरी दर्ता नभएको पौडेलले बताए । 'निर्वाचनलाई भयरहित र निष्पक्ष बनाउन हामीले दलहरूलाई सचेत गराइरहेका छौँ ।'-पौडेलले भने ।

दुई नगरपालिका र नौ गाउँपालिकामा निर्वाचन अधिकृतको कार्यालय स्थापना गरिसकेको उनले जानकारी दिए । 'अब कर्मचारी खटाउने तयारीमा छौँ ।'-पौडेलले भने-'जिल्लाभर झण्डै १ हजार ५ सय कर्मचारी निर्वाचनमा खटिनेछन् ।' निर्वाचनमा प्रयोग हुने मतपत्रलगायतका सामग्री जिल्लामा आइसकेको र सम्बन्धित मतदान केन्द्रमा ती सामग्री पुर्‍याउने प्रक्रिया सुरू भएको उनले बताए ।

प्रमुख जिल्ला अधिकारी जितेन्द्र बस्नेतले निर्वाचनको लागि एकीकृत सुरक्षा योजना बनाएर आफूहरू अघि वढेको बताए । 'निर्वाचन शान्तिपुर्ण र भयरहित वातावरणमा सम्पन्न गर्न सबै उपाय अबलम्वन गछौँ ।'-उनले भने ।

जिल्ला प्रहरी कार्यालयका एसपी जनकराज पाण्डेयले निर्वाचनका लागि चाहिने जनशक्ति माग गरिएको बताए । 'आजै पनि १ सय ८३ जना थप सुरक्षाकर्मी आएका छन् ।'-उनले भने-'हाम्रो जिल्लामा कम्तिमा ७ सय प्रहरी चाहिन्छ ।'

हरिराम उप्रेती