इन्सेक गतिविधिहरू

अनौपचारिक क्षेत्र सेवा केन्द्र (इन्सेक) तेहृथुमको आयोजनामा जिल्लामा नेपाल मानव अधिकार वर्ष पुस्तक २०२१ का लागि अभिलेखीकरण गरिएका घटनाहरूमाथि पुस ७ गते समीक्षा गरिएको छ ।

सन् २०२० को जनवरीदेखि डिसेम्बरसम्म सङ्कलन गरिएका मानव अधिकार उल्लङ्घन तथा ज्यादतीका घटनाहरूमाथि समीक्षा गरिएको हो ।

समीक्षा कार्यक्रममा म्याङलुङ नगरपालिकाका मेयर सञ्जयकुमार तुम्बाहाङफले जिल्लामा इन्सेकले मानव अधिकार उल्लङ्घन तथा ज्यादतीका घटनाहरू अभिलेखीकरण गरी सरोकारवालाहरूबीच समीक्षा गर्दा मानव अधिकारका सवालहरू मजबूत हुँदै आएको बताउनु भयो ।

उहाँले स्थानीय सरकारले इन्सेकसँग सहकार्य गरेर सचेतनात्मक कार्यक्रम सञ्चालन गर्ने बताउनु भयो ।

म्याङलुङ नगरपालिकाका उपप्रमुख पार्वतीसानु डाँगी पौडेलले स्थानीयतहमा उप प्रमुखको संयोजकत्वमा न्यायिक समिति गठन गरिएको भए पनि अधिकांश मुद्दाहरू जिल्ला प्रहरी कार्यालयमा जाने भएकोले उल्लेख्य सङ्ख्यामा उजुरी नआएको बताउनु भयो ।

महिला मानव अधिकार रक्षक सञ्जाल जिल्ला अध्यक्ष टङ्कमाया लिम्बूले इन्सेक सार्वजनिक गरेको घटनाहरू अध्ययन गर्दा आर्थिक अवस्था कमजोर भएका परिवारका सदस्यहरू पीडित भएको पाइएकोले अब स्थानीय सरकारले महिला हिंसाका घटनाहरू  न्यूनीकरणका लागि ठोस कार्ययोजना बनाएर कार्यक्रम सञ्चालन गर्नु पर्ने सुझाव दिनु भयो ।

जिल्ला प्रहरी कार्यालयका इन्स्पेक्टर कोमल ठाकुरले मानव अधिकार रक्षाका लागि सबैको साझा प्रयास आवश्यक रहेको बताउनु भयो ।

समीक्षा कार्यक्रममा जिल्लामा २०७६ पुस १६ गतेदेखि यता हत्याका दुई ओटा, बलात्कार र बलात्कार प्रयासका आठ ओटा, आत्महत्या दुरूत्साहनका दुई ओटा घटना गरी १२ ओटा घटना सार्वजनिक गरिएको छ ।

भगिश्वर लिम्बू