इन्सेक गतिविधिहरू

नेपाल मानव अधिकार वर्ष पुस्तक २०२३ का लागि जिल्लामा सङ्कलन गरिएका घटनाको प्रकाशन पूर्व अर्धवार्षिक समीक्षा कार्यक्रम असार ७ गते मलङ्वामा सम्पन्न भएको छ ।
सन् २०२२ को जनवरी १ देखि जुन १६ सम्मको अवधिमा सङ्कलन गरिएका मानव अधिकार उल्लङ्घन तथा ज्याद्तीका घटनाको प्रतिवेदन इन्सेक सर्लाही प्रतिनिधिले कार्यक्रममा प्रस्तुत गर्नु भएको थियो ।
प्रतिवेदनमा राज्य पक्षबाट भएका मानव अधिकार उल्लङ्घनका घटनामा प्रहरीको गोली लागी दुई जना घाइते, एक जना समान्य घाइते र प्रहरीको कुटपिटबाट एक घाइते भएको उल्लेख छ ।
त्यस्तै अन्य पक्षबाट हत्याका दुई, महिला हिंसा तथा यौन दुव्र्यवहारका चार, बलात्कार प्रयासका सात, झडप तथा कुटपिटका दुई, अज्ञात व्यक्तिबाट भएको घटना एक, अपहरणका एक र बलात्कार कसुरमा जिल्ला अदालतबाट भएको फैसला सात गरी २९ ओटा घटना सङ्कलन गरिएको प्रतिवेदन प्रस्तुत गरिएको थियो ।

इन्सेकले मानव अधिकार उल्लङ्घन घटना अभिलेख गरेर सरकार तथा स्थानीय सरोकारवाला निकायलाई ध्यानाकर्षण गराउने कार्य सराहनीय रहेको मलङ्गवा नगरपालिकाका उप–प्रमुख सकुन्तला देवी साहलले बताउनु भयो । इन्सेक प्रतिनिधिले जिल्ला भरिको स्थानीय तहसम्म पुगेर मानव अधिकारसम्बन्धी घटनाहरुको बारेमा कार्यक्रम जनचेतना मुलक कार्य योजना बनाई उजागर गर्नको लागी उहाँले सल्लाह–सुझाव दिनु भयो ।
लोकतन्त्र दैनिक पत्रिकाका सम्पादक मनोज यादवले जिल्लामा भएका कतिपय घटना छुटेको देखिएकोले मानव अधिकारसँग जोडिएको सर्लाही जिल्लाका घटनाहरु नछुटोस् भने सल्लाह–सुझाव दिनु भयो ।
न्यायिक समितिको क्षमता अभिबृद्धि गर्न सकेमा पीडित पक्षले सहज र छिटोछरितो न्याय पाउने गरि एक अर्काको सहयोग मिल्ने गरि मानव अधिकारको संरक्षणका लागि संघ–संस्था र पत्रकारले काम गर्नु पर्नेमा ओरेक नेपालकी प्रतिनिधि दुर्गा थापाले जोड दिनु भयो ।
नेपाल राष्ट्रिय दलित समाज कल्याण संघ सर्लाहीका अध्यक्ष राजेश पासवानले बाँच्न पाउने अधिकार तथा शिक्षा, स्वास्थ्य, खाद्य र आवासको अधिकारको सहज पहुँचबाट दलित तथा विपन्न समुदाय पिछडिएको अवस्था जिल्लामा देखिएको बताउन भयो ।
इन्सेकले मानव अधिकार उल्लङ्घनका घटना अभिलेख गर्नु र सरोकारवाला निकायसँग घटनाको पुष्टि तथा पुर्नपुष्टि गर्ने कार्य गर्नु सराहनीय रहेको मलंगवा नगरपालिका वडा नंं. २ का वडा अध्यक्ष धिरेन्द्र साहले बताउनु भयो ।

महिला हिंसा, बालविवाह र बहुविवाह लगायतका घटनाहरु हुन नदिन विशेष ध्यानमा राखेर वडाले कार्य गर्ने प्रतिबद्धता उहाँले जनाउनु भयो ।

जिल्ला प्रहरी कार्यालयका एसपी प्रविण पोखरेलले मानव अधिकारकर्मीहरूले दोषीलाई कारबाहीको दायरामा ल्याउन र वास्तविक पीडितलाई न्यायको प्रक्रियामा ल्याउनको लागि सहजिकरण गर्न आग्रह गर्नु भयो ।

कानुनको दायरामा रहि काम गर्नु पर्ने रहेकोले आफूले पीडितको न्यायका लागि सहज बनाउने प्रतिबद्धता उहाँले जनाउनु भयो ।

बुधन साह