इन्सेक गतिविधिहरू

अनौपचारिक क्षेत्र सेवा केन्द्र (इन्सेक) द्वारा पुस २५ गतेदेखि पुस २७ गतेसम्म धुलिखेलमा सञ्चालन गरिएको मध्यमाञ्चल क्षेत्रका विभिन्न सात जिल्लामा गठन गरिएका मानव अधिकार निगरानी समूहका पदाधिकारीहरूको नेतृत्व विकास तालिम सम्पन्न भएको छ ।

तालिमको समापन समारोहमा बोल्दै इन्सेकका कार्यकारी निर्देशक विजयराज गौतमले राज्यबाट प्रदान गरिने सेवा र सुविधाका विषयमा नागरिक सचेत र सजग रहनुपर्ने बताए । कार्यक्रम सञ्चालनका लागि आवश्यक सन्दर्भ सामग्री र सूचनाहरू इन्सेकबाट उपलव्ध गराइने बताउँदै उनले स्थानीय निकायहरूसँग समन्वयकारी भूमिकामा रहनुपर्नेमा उनले जोड दिए । उनले भने-'पहिलेभन्दा कार्यक्रम विस्तार गरिएको छ । कार्यक्रम सञ्चालनमा व्यवस्थापकीय कुनै कमजोरी रहन्न ।'

इन्सेकका मध्यमाञ्चल क्षेत्रीय कार्यालयका संयोजक कृष्ण गौतमले गाउँका विषय गाउँबाटै समाधान नभएमा जिल्ला, क्षेत्र वा केन्द्रसम्म पुर्‍याउन निगरानी समूहको महत्वपूर्ण भूमिका हुने बताए । उनले नीतिमा भएको तर व्यवहारमा नभएको विषयलाई उठाउनुपर्ने बताए । सहभागीका तर्फबाट सिन्धुपाल्चोककी रेखा थापा, बाराका फूर्साङ लामा, धनुषाकी उर्मिला यादव र रामेछापका बाबुकाजी दाहालले तालिम फलदायी भएको बताएका थिए ।

इन्सेकद्वारा सञ्चालित जिम्मेवार निकायलाई जवाफदेही बनाउने (इएलपी) कार्यक्रम मध्यमाञ्चल क्षेत्रका सात जिल्लामा सञ्चालन भएको छ । धनुषाको शान्तिपुर र बटेश्वर, धादिङको गोगनपानी र कल्लेरी, रामेछापको पुरानागाउँ, पर्साको गादी र मधुवन मथौल, सिन्धुपाल्चोकको ठूलोपाखर र थुम्पाखर, दोलखाको बोच र लाकुरीडाँडा, बाराको भोडहा र मनहर्वा गाविसमा ३ वर्षसम्म यो कार्यक्रम सञ्चालन हुनेछ ।

तालिममा शिक्षा, स्वास्थ्य र खाद्य अधिकार, सेवा प्रदायक निकाय र तिनीहरूका काम, कर्तव्य, अधिकार, नेतृत्व विकास, नेपालको संविधान र मौलिक हक, सरकारको नीति तथा कार्यक्रम र सम्वन्धित कार्यालयको भूमिका, विकास, सुशासन र पारदर्शिता, समस्या पहिचान आदि विषयमा सत्र सञ्चालन गरिएको थियो ।

भोजराज तिमल्सिना