इन्सेक गतिविधिहरू

घिल्लो वर्षभन्दा सन् २०१८ को नोभेम्बरसम्म जिल्लामा मानव अधिकारका घटनामा बृद्धि भएको पाइएको छ ।

अनौपचारिक सेवा केन्द्र (इन्सेक)ले आयोजना गरेको नेपाल मानव अधिकार वर्ष पुस्तकको प्रकाशन पूर्व वार्षिक समीक्षा कार्यक्रममा सार्वजनिक गरिएको प्रतिवेदनले त्यस्तो अवस्था देखाएको हो ।

अघिल्लो वर्षको यहि अवधिसम्म जिल्लाभरमा १९ ओटा मानव अधिकार उल्लङ्घन तथा ज्यादतीका घटना अभिलेख गरिएकोमा यो वर्षमा हालसम्म २५ ओटा घटना अभिलेख गरिएको इन्सेकले जनाएको छ ।

२५ ओटा त्यस्ता घटनामध्ये महिला हिंसाका मात्र आठ ओटा रहेको कार्यक्रममा जानकारी गराइएको थियो ।

कार्यक्रममा सहभागी कर्णाली प्रदेशका साँसद दानसिंह परियारले देशको केन्द्रीय स्तरसम्म जिल्लाका कुनै राजनीतिक दल र तिनका नेताहरूको पहुँच पुग्न नसक्दा मुगाली जनताले पाउनु पर्ने न्यूनतम सेवा सुविधाबाट वञ्चित हुने अवस्था आएको बताए ।

राज्यबाट प्रवाह हुने सवै सेवा सुविधा निश्चित व्यक्तिले मात्र प्रयोग तथा उपभोग गर्दा नागरिकले पाउनु पर्ने सेवा सुविधाको अधिकारबाट वञ्चित हुनु परेको उनको कथन छ ।

प्रमुख जिल्ला अधिकारी उमाकान्त अधिकारीले मुगुमा मात्र नभएर कर्णालीमा नै सामाजिक, आर्थिक, सांस्कृतिक, धार्मिक, राजनीतिक क्षेत्रमा मानव अधिकारको उल्लङ्घन भएको बताए ।

जिल्लामा बालविवाह, बहुविवाह, घरेलु हिंसाले प्रश्रय पाउँदै आएकाले जिल्लाको मानव अधिकारको क्षेत्रमा सन्तोष गर्ने अवस्था नभएको उनको भनाई छ ।

जीवन सेजुवाल