इन्सेक गतिविधिहरू

जिल्लाको मानव अधिकारको अवस्था र चुनौतीका विषयमा जिल्लास्थित अधिकारकर्मी, वकिल, सञ्चारकर्मीहरूसँगको साझेदारी बैठक सम्पन्न भएको छ । इन्सेक नेपालगञ्जको आयोजनामा जाजरकोट सदरमुकाममा वैशाख ५ गते बैठक आयोजना गरिएको हो ।

बैठकमा जाजरकोट जिल्लामा सबैभन्दा बढी बालविवाह, बलात्कार र महिला हिंसाका घटना रहेका औँल्याउँदै सचेतनामा जोड दिइएको छ ।

शिक्षा, स्वास्थ्यका क्षेत्रमा पनि निकै समस्या रहेको सरोकारवालाहरूले बताएका छन् । स्थानीय तहबाट शिक्षा क्षेत्रमा छुट्याउनुपर्ने बजेट समेत नछुट्याउने गरेको र स्वास्थ्य संस्थाहरूमा समेत सामान्य औषधिको अभाव रहेको समेत बैठकमा सहभागीहरूले बताएका छन् ।

साझेदारी बैठकमा जिल्लामा घट्ने कर्तव्य ज्यानलगायत अन्य जघन्य अपराधका घटनालाई प्रहरीले सुरूमा मुद्दा दर्ता गर्न समेत आलटाल गर्ने यदी मुद्दा दर्ता गर्न बाध्य भएको अवस्थामा मुद्दाको मिसिलनै कमजोर बनाउने खालको समस्या रहेको समेत सरोकारवालाहरूले आरोप लगाएका छन् ।

साझेदारी बैठकमा इन्सेक नेपालगञ्ज कार्यालयका संयोजक भोला महतले इन्सेकले २५ वर्षदेखि प्रकाशन गर्दै आएको मानव अधिकारका घटनाको अभिलेखीकरण मानव अधिकार वर्ष पुस्तकलाई विस्तारै परिस्कृत गर्दै आएको र अहिले मुलुक सङ्घीय संरचनामा गएको अवस्थामा इन्सेकले समेत आफ्नो पुस्तकलाई प्रादेशिक संरचनामा यस प्रकाशन गर्न थालेको बताए ।

दिनेशकुमार श्रेष्ठ