इन्सेक गतिविधिहरू

अनौपचारिक क्षेत्र सेवा केन्द्र (इन्सेक) द्वारा पर्वत जिल्लामा सन् २०२४ को जनवरी देखि जुन सम्म प्रलेखिकरण गरेका घटनाहरुको अर्धवार्षिक पुर्व समीक्षा असार १३ गते सम्पन्न गरेको छ । मानवअधिकार वर्ष पुस्तक २०२५ का लागि संकलन गरिएका विवरणहरुको समीक्षा गरि तथ्याङ्क सार्वजनिक गरिएको हो । कार्यक्रममा इन्सेकका जिल्ला प्रतिनिधि सन्तोष थापाले जिल्लामा भएका मानवअधिकार उल्लंघन तथा ज्यादतीका घटनाको बारेमा जानकारी गराउनु भएको थियो ।

कार्यक्रममा इन्सेक प्रतिनिधि थापाले जिल्लामा सन् २०२४ जनवरी देखि हालसम्म १२ ओटा घटनाहरु संकलन गरिएको जानकारी दिनुभयो । जस अनुसार घरेलु हिंसा ६, बलात्कार तथा यौन दुर्व्यवहार चार, हत्याको एक र आत्महत्या दुरुत्साहनका एक ओटा घटना रहेका छन् ।

कार्यक्रममा कुश्मा नगरपालिकाका नगर प्रमुख रामचन्द्र जोशीले मानवअधिकार संरक्षणको सवालमा सबैले चासो दिनुपर्ने बताउनुभयो । उहाँले आगामी आर्थिक वर्षका लागि कुश्मा नगरपालिकाले मानवअधिकारका क्षेत्रमा उल्लेख्य काम गर्ने उद्देश्यले बजेट व्यवस्थापन गरेको बताउँदै अन्य पालिकाले पनि सोही अनुरुप कार्यक्रम अघि बढाएमा पर्वत जिल्लालाई मानवअधिकार मैत्री जिल्लाका रुपमा अघि बढाउन सकिने धारणा व्यक्त गर्नुभयो ।

कार्यक्रममा नेपाल पत्रकार महासंघका केन्द्रीय सदस्य छविलाल तिवारीले मानवअधिकार मैत्री समाज निर्माणका लागि स्थानीय तहहरु अनुदार बनेको बताउँदै भोलिका दिनमा मानवअधिकारको सम्वर्द्धनका लागि सबै आ आफ्नो क्षेत्रबाट लाग्नुपर्ने बताउनुभयो ।

मानवअधिकार रक्षक सञ्जालकी केन्द्रीय सदस्य माया अधिकारीले मानवअधिकार नारामा मात्रै सिमित रहेको बताउँदै मानवअधिकार सँगै महिला अधिकारको समेत संरक्षण र सम्वर्द्धनका लागि एकजुट हुनुपर्ने धारणा राख्नुभयो । उहाँले बालबालिका, एकल महिला, ज्येष्ठ नागरिक लगायतले पछिल्लो समय राज्यतहबाट विभिन्न दुःख झेल्नुपर्ने अवस्था आएको बताउँदै राज्यले यी र यस्ता सवालमा सहज व्यवस्थापन गर्नुपर्ने बताउनुभयो ।

सन्तोष थापा