इन्सेक गतिविधिहरू

महिलासँग सम्बन्धित अधिकारको बारेमा पुरुषहरूलाई जानकारी दिन नुवाकोटमा सञ्चालन गरिएको दुईदिने कार्यक्रम सम्पन्न भएको छ ।

शिवपुरी गाउँपालिका वडा नं. ७ र ८ मा रहेका महिला समूहका सदस्यहरूको घरको पुरुष सदस्यको लागि तालिम सञ्चालन गरिएको हो । विदुरमा फागुन ९ र १० गते सञ्चालन गरिएको तामिलमा सहभागीहरूलाई मानव अधिकार, महिला अधिकार, महिला अधिकारसँग सम्बन्धित कानुनहरूको विषयमा जानकारी दिइएको थियो ।

इन्सेक लगायतको सहकार्यमा शिवपुरी गाउँपालिका–७ र ८ सञ्चालित अधिकार तथा आर्थिक विकासमार्फत महिला सशक्तिकरण कार्यक्रम (रिन्यु परियोजना) सञ्चालन भइरहेको छ । परियोजना अन्तर्गत गठन भएका महिला समूहका सदस्यको घरका पुरुष सदस्यहरूलाई तालिममा सहभागी गराइएको थियो ।

महिला अधिकार र मानवअधिकारको विषयमा समूहका महिलालेमात्र नभई पुरुषलाई पनि जानकारी भएमात्र परिवार र समाजमा महिला र पुरुषबीचको सहअस्तित्व बलियो हुने उद्देश्य राखेर प्रशिक्षण सञ्चालन गरिएको परियोजनाका प्रमुख कृष्णप्रसाद नेपालले बताउनुभयो ।

सहभागीहरूलाई नुवाकोट जिल्ला अदालतका इजलास अधिकृत रीता लामिछानेले घरेलु हिंसा र यससँग सम्बन्धित कानुनी विषयको साथै अदालतमा न्याय निरुपणको विषयमा जानकारी दिनुभएको थियो ।

मानव अधिकार, महिला अधिकार, मानव अधिकारको अवधारणा र विकासक्रम, आर्थिक समाजिक र सांस्कृतिक अधिकार, नेपालको संविधान र मौलिक हक, नेतृत्व विकास लगायत विषयमा प्रशिक्षण दिइएको थियो । सहभागीहरुलाई इन्सेकका व्यवस्थापन प्रमुख शुभेच्छा खड्का, रिन्यु परियोजनाका कृष्णप्रसाद नेपाल र इन्सेक जिल्ला प्रतिनिधीसमेत रहेका अधिवक्ता नवदीप श्रेष्ठले सहजीकरण गर्नुभएको थियो ।

सहभागीहरूले स्थानीयस्तरका काम गर्दा आएका देवानी प्रकृति र फौजदारी प्रकृतिका समस्याहरूमाथि पनि छलफल गरेका थिए ।

तालिमको उद्घाटनमा शिवपुरी गाउँपालिकाका अध्यक्ष गोविन्दप्रसाद थपलियाले महिला अधिकारको विषयमा पुरुषलाई जानकारी दिने तालिमले समाजमा महिलामाथि हुने गरेको हिंसाको घटनाहरूमा कमी आउने अपेक्षा राखेको बताउनुभयो ।

कार्यक्रममा शिवपुरी गाउँपालिकाका उपाध्यक्ष वीरबहादुर तामाङले महिलामाथि हुने गरेको हिंसा र विभेदको घटनाहरूलाई कमी गराउनको लागि स्थानीय तहहरूले सचेतनाका अभियानहरू सञ्चालन गरिरहेको जानकारी दिनुभयो ।

नवदीप श्रेष्ठ