इन्सेक गतिविधिहरू

मरिण गाउँपालिकामा मानव अधिकार अभिमुखीकरण कार्यक्रम सम्पन्न भएको छ । मरिण गाउँपालिकाको आयोजना, स्वाधीन खबर पत्रिकाको समन्वय र इन्सेकको सहकार्यमा जेठ २१ गते अभिमुखीकरण कार्यक्रम सम्पन्न भएको हो ।

कार्यक्रममा इन्सेकका अध्यक्ष तथा त्रिभुवन विश्वविद्यालयका सहप्राध्यापक समेत रहनुभएका डा. कुन्दन अर्यालले सुशासन र मानव अधिकारको विषयमा सहजीकरण गर्नुभएको थियो ।

उहाँले स्थानीय तहमा भ्रस्टाचार विरुद्धको शून्य सहनशीलता कायम गर्नु पर्ने धारणा राख्नु भयाे ।

कार्यक्रममा गाउँपालिकाका अध्यक्ष विर्मस मुक्तानले मानव अधिकारको क्षेत्र फराकिलो भएको बताउँदै  सशस्त्र द्वन्द्वकालमा मानव अधिकार उलङ्घनका घटनाहरू इन्सेकले पत्ता लगाई सार्वजनिकीकरण गरेको बताए ।
मानव अधिकारको क्षेत्रमा क्रियाशील सङ्घ संस्थाहरूले ग्रामीण क्षेत्रका जनतालाई सूचना मार्फत चेतना फैलाउने काम गर्नुपर्ने मुक्तानले बताउनु भयो ।

उहाँले राष्ट्रिय स्तरका प्रशिक्षकहरू यस पालिकामा आई आर्थिक, सामाजिक, साँस्कृतिक अधिकारको साथसाथै सुशासन र विकासका बारेमा जनतालाई जागरुक गराउन सहयोग पुर्‍याएको बताउनु भयो ।

साथै, आगामी वर्षको नीति तथा कार्यक्रममा मानव अधिकार सम्बन्धी कार्यक्रम सञ्चालनका लागि पालिकाले आर्थिक सहयोग गर्ने प्रतिवद्धता जनाउनु भयो ।

राष्ट्रिय मानव अधिकार आयोगका सहसचिव नवराज सापकोटाले मानव अधिकार र मौलिक हकको विषयमा प्रष्ट्याउनु भएको थियो ।

साथै मानव अधिकार राष्ट्रिय कार्ययोजनाको बारेमा राष्ट्रिय मानव अधिकार आयोगका सहसचिव यज्ञप्रसाद अधिकारीले सहजीकरण गर्नुभएको थियो ।

अभिमुखीकरण कार्यक्रममा मेलमिलाप र स्थानीय न्यायिक समितिको अवस्थाको विषयमा अधिवक्ता प्रेक्षा ओझाले सहभागीहरूलाई जानकारी गराउनु भएको थियो ।

इन्सेकका बरिष्ठ अधिकृत सम्झा श्रेष्ठले सङ्घीयता र मानव अधिकारको विषयमा सहजीकरण गर्नुभएको थियो ।

कार्यक्रममा स्वाधीन पत्रिकाका प्रधान सम्पादक रुद्र खड्काले स्वागत मन्तव्य तथा कार्यक्रमको उद्देश्य विषयमा प्रकाश पार्नुभएको थियो ।

गाउँपालिकाका अध्यक्ष विमर्स मुक्तानको अध्यक्षतामा भएको कार्यक्रममा वडाध्यक्ष, वडा सदस्य, मेलमिलाप कर्ता तथा कर्मचारीहरूको सहभागीता रहेको थियो ।

इन्सेक बागमती प्रदेश कार्यालय, काठमाडौँ