मध्यपश्चिमाञ्चल क्षेत्रका विभिन्न जिल्लामा मानव अधिकार वर्ष पुस्तक प्रकाशन पूर्व समीक्षा सम्पन्न

  ०७४ जेठ ३१ गते

नेपाल मानव अधिकार वर्ष पुस्तक-२०१८ का लागि सङ्कलित घटनाहरूको प्रकाशन पूर्व जिल्लाका सरोकारवाला निकायबिच अर्धवार्षिक पूर्व समीक्षा कार्यक्रम सम्पन्न भएका समाचार इन्सेकका विभिन्न जिल्ला प्रतिनिधिहरूले पठाएका छन् ।

कालिकोट जिल्ला प्रतिनिधि कालीबहादुर मल्लका अनुसार प्रकाशन पूर्व अर्धवार्षिक समीक्षा कार्यक्रम जेठ ३१ गते कालिकोटमा सम्पन्न भएको छ । इन्सेक कालिकोटको आयोजनामा मानव अधिकार वर्ष पुस्तक-२०१८ का लागि सङ्कलित घटनाहरूको प्रकाशन पूर्व अर्धवार्षिक समीक्षा कार्यक्रम सम्पन्न भएको हो ।

Photo20170614Kalikot

६ महिनाको अवधिमा राज्य पक्षबाट दुई ओटा, राजनीतिक दलबाट आठ ओटा घटना भएको प्रतिवेदन सार्वजनिक गरिएको छ । त्यसैगरी बाल विवाहको एक, कथित बोक्सीको आरोपमा अमानवीय व्यवहार एक, बहुविवाहका एक, यौन दुर्व्यवहारका एक र पारिवारीक हिंसाका चार ओटा घटनासमेत १८ ओटा घटना समावेश गरिएको प्रतिवेदन सरोकारवालाका बिचमा प्रस्तुत गरिएको थियो ।

'राष्ट्रिय तथा अन्तर्राष्ट्रिय संस्थाले राज्यले मानव अधिकार हनन् गर्‍यो भनेर दोष दिने गरेका छन् । तर, राज्यले चाहेर हैन बाध्यताले बल प्रयोग गर्नुपर्ने अवस्था आउने गरेको छ ।'-प्रमुख जिल्ला अधिकारी गिरीधार सुवेदीले भने ।

उनले राज्यले चाहेर मानव अधिकार उल्लङ्घन नगरेको भएपनि यसप्रति जिम्मेवार पक्ष सचेत रहेको बताए । जिल्लामा मानव अधिकारका अधिकांश घटनामा राजनीतिक दलको दबावले घटनामा संलग्न व्यक्तिले उन्मुक्ति पाउने गरेको जिल्ला प्रहरी कार्यालयका डिएसपी योगेन्द्रकुमार खड्काले बताए । 'मानव अधिकारका अधिकांश घटनामा राजनीतिक दबाव दिने गरिएको छ ।'-उनले भने । यसलाई रोक्न समाजमा सबै राजनीतिक दलको सामूहिक प्रतिबद्धताको खाँचो रहेको उनले औँल्याए ।

जिल्लामा मानव अधिकार उल्लङ्घनका घटना न्यूनीकरण गर्न सबै सरोकारवाला पक्षको उत्तिकै भूमिका रहेको नेकपा एमालेका जिल्ला अध्यक्ष नगेन्द्र शाहीले बताए । उनले मानव अधिकार उल्लङ्घनका घटना न्यूनीकरण गर्न सबै जिम्मेवार पक्ष लाग्न जरूरी रहेको बताए ।

नेपाली काङ्ग्रेसका सहसचिव दमनबहादुर शाहीले मानव अधिकार हनन्का घटनामा कमी ल्याउन जिल्लामा रहेका सबै क्रियाशील राजनीतिक दल तथा प्रशासक सचेत हुनुपर्ने बताए । उनले मानव अधिकारको संरक्षणका लागि नेपाली काङ्ग्रेस पूर्ण रूपमा प्रतिबद्ध रहेको बताए ।

प्यूठान जिल्ला प्रतिनिधि रविन्द्र पाण्डेका अनुसार नेपाल मानव अधिकार वर्ष पुस्तक-२०१८ का लागि सङ्कलित घटनाहरूको प्रकाशन पूर्व अर्धवार्षिक समीक्षा कार्यक्रम जेठ ३१ गते सम्पन्न भएको छ । जिल्लामा सन् २०१७ को जनवरीदेखि जुन १४ गतेसम्म मानव अधिकार उल्लङ्घन भएका घटनाको सरोकारवाला निकायबिच समीक्षा गरिएको हो ।

Photo20170614Pyuthan

कार्यक्रममा प्रमुख जिल्ला अधिकारी यदुनाथ पौडेलले इन्सेकले प्रकाशन गर्दै आएको नेपाल मानव अधिकार वर्ष पुस्तक नेपालको मानव अधिकार क्षेत्रको महत्वपूर्ण दस्तावेज भएको र यस पुस्तकलाई समय सापेक्ष परिवर्तन गर्नुपर्ने सुझाव दिए ।

कार्यक्रममा बोल्दै जिल्ला सरकारी वकिल खिमानन्द गौतमले इन्सेकले वर्ष पुस्तकमा आर्थिक, सामाजिक र सांस्कृतिक घटना पनि समावेश गरेमा प्रभावकारी हुने बताए । यस अवधिमा जिल्लामा घरेलु हिंसा, बलात्कार/बलात्कारका प्रयास, हत्या, हिरासतमा मृत्युलगायतका १२ ओटा घटना भएको इन्सेकले सरोकारवालाबिच प्रस्तुत गरेको थियो ।

इन्सेकले अभिलेख गरेका घटनाहरूमा घरेलु हिंसाका ६, बलात्कारको एक, बलात्कार प्रयासका दुई, हत्याको एक, हिरासतमा मृत्यु एक र गैरकानुनी गिरफ्तारीको एउटा घटना रहेका छन् ।

सुर्खेत जिल्ला प्रतिनिधि दुर्गा थापाका अनुसार मानव अधिकार उल्लङ्घनका घटनाहरूको प्रकाशन पूर्व अर्धवार्षिक समीक्षा कार्यक्रम जेठ ३० गते वीरेन्द्रनगरमा सम्पन्न भएको छ । इन्सेक जिल्ला प्रतिनिधि दुर्गा थापाले सन् २०१७ को ६ महिनाको अवधिमा भएका मानव अधिकार उल्लङ्घनका घटनाको प्रतिवेदन प्रस्तुत गरेपछि कार्यक्रममा सहभागीहरूले टिप्पणीसहित सुझाव दिएका थिए ।

कार्यक्रममा नेपाली काङ्ग्रेसका नवल गिरीले कुनैपनि घटनाको सम्बन्धमा वस्तुनिष्ठ हुनुपर्नेमा जोड दिए । एमाले सुर्खेतका उपाध्यक्ष अमृत विसीले मानव अधिकार उल्लङ्घनका सबै घटनाहरूको गहिराइमा पुगेर मात्र वर्ष पुस्तकमा समेट्नु पर्ने बताए ।

Photo20170614Surkhet

जिल्ला प्रशासन कार्यालय सुर्खेतका प्रतिनिधि किरणकुमार थापाले इन्सेकले मानव अधिकार संरक्षण र सम्बर्द्धनका लागि खेलेको भूमिका सरहानीय रहेको उल्लेख गरे । इन्सेक जिल्ला प्रतिनिधिले सरोकारवाला निकायसमक्ष जिल्लामा भएका ५४ ओटा घटना प्रस्तुत गरेका थिए । जसमध्ये घरेलु हिंसाका ४५, पतिबाट हत्या गरिएको एक, धम्की र कुटपिटका दुई, बलात्कार/बलात्कार प्रयासका दुई, जातीय विभेदको एउटालगायतका घटना रहेका छन् ।

जाजरकोट जिल्ला प्रतिनिधि दिनेशकुमार श्रेष्ठका अनुसार मानव अधिकार वर्ष पुस्तक २०१८ का लागि सङ्कलित घटनाहरूको प्रकाशन पूर्व अर्धवार्षिक समीक्षा कार्यक्रम जेठ ३० गते सम्पन्न भएको छ ।

Photo20170614Jajarkot

प्रमुख जिल्ला अधिकारी कृष्णचन्द्र पौडेलले मानव अधिकार उल्लङ्घनका घटना हुन नदिन नागरिकलाई सचेतना गराउनु पर्नेमा जोड दिए । कार्यक्रममा प्रजिअ पौडेलले जिल्लामा हुने मानव अधिकार उल्लङ्घनका घटनालाई इन्सेकले सङ्कलन गरी प्रत्येक वर्ष पुस्तकका रूपमा प्रकाशन गर्ने गरेको र यसका लागि सबैबाट सहयोग हुनुपर्ने बताए ।

जिल्ला प्रशासन कार्यालयबाट हुनसक्ने सहयोग गर्न आफू तयार रहेको प्रजिअ पौडेल बताए । कार्यक्रममा इन्सेक जिल्ला प्रतिनिधि दिनेशकुमार श्रेष्ठले विगत ६ महिनामा सङ्कलन गरिएका १६ ओटा मानव अधिकार उल्लङ्घनका घटनाहरू प्रस्तुत गरेका थिए ।

इन्सेक क्षेत्रीय कार्यालय, नेपालगञ्ज