इन्सेक गतिविधिहरू

कार्यक्रममा ललितपुर महानगरपालिका, काठमाडौँ महानगरपालिका, भक्तपुर नगरपालिका, शङ्खरापुर नगरपालिका र चन्द्रागिरी नगरपालिकाका शिक्षिका/शिक्षक इन्सेकको प्रधान कार्यालयमा आयोजित सचेतना भेलामा सहभागी भएका थिए ।

इन्सेकका कार्यकारी निर्देशक विजय राज गौतमले शिक्षकहरु मानव अधिकारका अभियन्ता रहेको बताउँदै आपतकालीन तयारीका प्रमुख स्रोतको रूपमा काम गर्दै निरन्तरता दिनुपर्नेमा जोड दिनु भयो।

कार्यक्रममा इन्सेककी पैरवी कार्यक्रम प्रमुख सम्झा श्रेष्ठले विपत्का बेलामा मानव अधिकारको सुनिश्चितता जटिल कार्य भएको बताउँदै सो बारेमा ध्यान दिनुपर्नेमा जोड दिनु भयो ।

इन्सेकका सूचना अधिकारी कृष्ण गौतमले संस्थाको ऐतिहासिक यात्रा समेट्दै इन्सेकको ३७ वर्षको इतिहासबारे संक्षिप्तमा जानकारी दिनु भयो ।

कार्यक्रममा आपतकालीन तयारी र मानव अधिकार प्रवर्धनका महत्त्वपूर्ण पक्षहरूमा जोड दिँदै जोखिम न्यूनिकरणका विषयमा छलफल गरिएको परियोजना अधिकृत जगन्नाथ कँडेलले बताउनु भयो ।

प्लस आर्टस् एन.पी.ओ., सिटिनेट योकोहामा, जाइका नेपालको सहयोगमा इन्सेकद्वारा सञ्चालित “स्कूल क्लबमा आधारित उत्थानशील समुदाय मोडल परियोजना” मार्फत जोखिम न्यूनीकरणको लागि तालिम प्राप्त तथा सन् २०२३ र २०२४ मा जापानको विभिन्न विपत् जोखिम न्यूनीकरण सेन्टर भ्रमणमा गएका शिक्षिका/शिक्षक कार्यक्रममा सहभागी भएका हुन् ।

कार्यक्रममा उक्त भ्रमणबाट प्राप्त सिकाइ र जापानको आपतकालीन तयारीका मोडेल तथा नेपालका विद्यालय एवम् समुदायमा तिनीहरूको प्रयोगको बारेमा चर्चा गरिएको थियो।