इन्सेक गतिविधिहरू

भक्तपुरका भूकम्प पीडितले अझै अनुदान नपाएको गुनासो गरेका छन् । अनौपचारिक क्षेत्र सेवा केन्द्र (इन्सेक) को आयोजनामा भक्तपुरको गुण्डुमा गरेको भुकम्प पीडितका लागि राहत तथा पुनर्निर्माणको सवाल विषय सार्वजनिक सुनुवाइ कार्यक्रममा भूकम्प पीडितहरूले भवन निर्माण अन्तर्गतको पहिलो किस्ता अनुदान र राहत रकम अहिलेसम्म पनि नपाएको गुनासो गरेका हुन् ।

कार्यक्रममा सुर्यविनायक नपा-७ गुण्डुकी सविता थापामगरले घर भत्किएर टहरामा बस्दै आएपनि आफ्नो नाम पीडितको सूचीमा नपर्दा अनुदान नपाएको बताइन् ।

सुर्यविनायक-७ की जयश्वरी नगरकोटीले भूकम्पलेसँगै घर भत्किएर अलपत्र परेका दाजुको परिवारले अनुदान पाएपनि आफूले भने अनुदान नपाएको बताउँदै गुनासो फाराम भर्दा पनि सम्बोधन नभएको गुनोसो पोखिन् । त्यसैगरी प्रभाकर राजभण्डारीले भूकम्पले आफ्नो घर चिराचिरा परेपनि भूकम्प पीडितको नामबाटै हटाएर अनुदानबाट वञ्चित गरिएको बताए ।

वास्तविक भूकम्प पीडित भएपनि सरकारले दिने अनुदान र सरकारले दिएको राहत अहिलेसम्म पाउन नसकेको कार्यक्रममा सहभागी भएका पीडितहरूले गुनासो गरेका थिए ।

कार्यक्रममा राष्ट्रिय पुनर्निर्माण प्राधिकरण जिल्ला समन्वय समिति सचिवालय कार्यालयका प्रमुख शिवराम गेलालले सम्झौता भएपनि कागजपत्र नपुगेकाको फाईल फिर्ता हुने र कागजी प्रक्रिया पुगेपछि अनुदान सम्झौता हुने बताउँदै सम्झौता भएकाको केहीदिन भित्रै बैङ्कको खातामा पैसा जाने बताए ।

पीडितको पक्षमा सरकार, सरोकारवाला जिम्मेवार निकाय, कर्मचारी र जनप्रतिनिधिले आ-आफ्नो जिम्मेवारी प्रभावकारी रूपमा निर्वाह गर्नुपर्नेमा जोड दिने बताए ।

सुर्यविनायक नगरपालिका-७ का अध्यक्ष रविन्द्र सापकोटाले गुण्डुमा १ हजार ४ सय ८३ भूकम्प पीडितले रातो कार्ड पाएपनि २ सय ९९ घर अनुदान पाउनबाट छुटेपछि वडा कार्यालयले समन्वय गर्दै अगाडि बढेको बताए । पुनः सर्वेक्षणमा भूकम्प पीडित भनेर गएका ४६ ओटा फाईल फिर्ता आउँदा समस्या परेको बताए ।

मानव अधिकार संञ्जाल भक्तपुरका संयोजक रोशन अर्यालले भुकम्प पीडितको गुनासो र समस्या धेरै रहेकाले उनीहरूको गुनासो सम्बोधनमा राज्यले छिटो प्रक्रिया अगाडि बढाउनु पर्नेमा जोड दिए ।

सविना केसी