इन्सेक गतिविधिहरू

भक्तपुरका भूकम्प पीडितले अझै अनुदान नपाएको गुनासो गरेका छन् । उनीहरूले भूकम्प पीडितलाई राहत दिन स्थापना गरिएका कार्यालयका कर्मचारीहरू तलब खाएर पीडितलाई राहत दिनुको साटो काममा ढिलाई गर्ने र समस्या सिर्जना गर्नेमा मात्र लागेको गुनासो गरे ।

अनौपचारिक क्षेत्र सेवा केन्द्र (इन्सेक) भक्तपुरले दुधपाटीमा आयोजना गरेको सार्वजनिक सुनुवाइ कार्यक्रममा भूकम्प पीडितहरूले भवन निर्माण अन्तर्गतको पहिलो किस्ता अनुदान र राहत रकम अहिलेसम्म पनि नपाएको गुनासो गरेका हुन् ।

भूकम्पले घर भत्किएर बस्ने ठाउँ नभएको र अहिलेसम्म भाडामा बस्न बाध्य भएको रस्मिला अवालले बताइन् । २२ घण्टा पुरिएर बाँच्न सफल सोनिस अवालकी आमा रस्मिला अवालले भनिन्-'म वास्तविक भूकम्प पीडित हुँ । तर, सरकारले दिने अनुदान र सरकारले दिएको राहत अहिलेसम्म पाउन सकेककी छैन ।' सबैले छोराछोरी दुवै पुरिएको र छोरा सोनिसको तस्विर राष्ट्रिय तथा अन्तर्राष्ट्रिय स्तरमा छापिएको र सबैले भुकम्प पीडित भनेर चिने पनि सरकारले भने अहिलेसम्म नचिनेको उनको गुनासो छ ।

चाँगुनारायण-९ ताथलीका राजेन्द्र थापाले कर्मचारी तलब मात्र खाने कार्यालय र तलबमा बढी खर्च हुने तर पीडितलाई भने कम राहत दिने गरेको आरोप लगाए । 'कार्यक्रममा सम्बन्धित पक्ष आउन गाह्रो मान्छन् । काम के गर्लान ?'-उनको प्रश्न छ । सरकारले पहिलो किस्ताको अनुदान रकम वितरण गरेपनि त्यो रकमले घर बनाउन नपुग्ने बताएका छन् ।

कार्यक्रममा चाँगुनारायण नपा-२ का किरण माकजुले भूकम्प पीडित अनुदान रकम पाउनबाट छुट्न नहुने बताउँदै सरकारले यसतर्फध्यान दिनुपर्ने र जनप्रतिनिधिको भूमिका महत्वपूर्ण हुनुपर्ने विचार राखे ।

कार्यक्रममा चाँगुनारायण-१ दुवाकोटका बच्चुराम न्यौपाने गुठीको जग्गाको प्रमाण नहुँदा समस्स्या  भएको बताउँछन् । 'जग्गाको मन्जुरीनामा नदिँदा पनि धेरै समस्या भएको छ ।'-उनले भने ।

आफ्नो नाममा जग्गा नभएका भूकम्प पीडितलाई पनि अनुदान दिनु पर्ने बताउँदै न्यौपानेले भूकम्प पीडितको नाम र थर नमिलेकै कारण अनुदान रकम पाउन समस्या परेको उल्लेख गरे ।

कार्यक्रममा भूकम्प पीडितले सरकारले छिटो, सहज ढङ्गले थप अनुदान दिन र नाम छुटेकाहरूलाई प्रक्रिया पुर्‍याएर तत्कालै रकम वितरण गर्न माग गरेका थिए ।

राष्ट्रिय भूकम्प पुनर्निर्माण प्राधिकरण जिल्ला सचिवालयको कार्यालयका प्रमुख मुरारी वस्ती, मध्यपुर थिमि नगरपालिकाका प्रमुख मदनसुन्दर श्रेष्ठ, सुर्यविनायक नगरपालिकाका उपप्रमुख जुना बस्नेत, क्रियाशील पत्रकार मञ्चका अध्यक्ष रमेश गिरी र सूचना अधिकार समाजका अध्यक्ष सोम शर्मा (बजगाईं), लगायतले पीडितको पक्षमा सरकार, सरोकारवाला जिम्मेवार निकाय, कर्मचारी र जनप्रतिनिधीले आ-आफ्नो जिम्मेवारी प्रभावकारी रूपमा निर्वाह गर्नुपर्नेमा जोड दिए ।

मानव अधिकार सञ्जाल भक्तपुरका संयोजक रोशनराज अर्यालले भूकम्प पीडितको गुनासो र समस्या धेरै रहेकाले उनीहरूको गुनासो सम्बोधनमा राज्यले छिटो प्रक्रिया अगाडि बढाउनु पर्नेमा जोड दिए ।

सविना केसी