बोर्लाङका भूकम्प पीडितको गुनासै गुनासो

  ०७३ मङ्सिर ६ गते

बोर्लाङ गाविसका भूकम्प पीडितहरूले राहत वापत पहिलो किस्ताको रकम पाए पनि घर बनाउन नसक्ने भन्दै चिन्ता जनाएका छन् । जिल्लाका भुकम्प पीडित परिवारहरुले राहत रकम पाएपनि तुरून्तै घर बनाउन सम्भव नभएको बताएका छन् ।

photo20161121gorkha-2

भूकम्प पीडितको अवस्थाबारे मानवअधिकार सञ्जाल र इन्सेक गोरखाको संयुक्त आयोजनामा कात्तिक ४ गते बोर्लाङ-४ मा भएको र्सार्वजनिक सुनुवाइ कार्यक्रमका सहभागीहरूले चिन्ता जनाएका हुन् । 'एक महिलाको बारेमा कहिँ कतै केहि कुरा उठान हुँदैन । नत उहाँहरू आफैँले घर बनाउन सक्नुहुन्छ । न उहाँहरूको बारेमा बोल्दिने नै कोही छ !'-बोर्लाङ-२ का वडा नागरिक मञ्चका संयोजक एकु पाण्डेले भने ।

photo20161121gorkha-3

सोही र्सार्वजनिक सुनुवाइ कार्यक्रममा बोल्दै सरस्वती उमाविका शिक्षक कृष्ण गोतामेले भूकम्प पीडित एकल महिलाको घर कसरी बनाउने भन्ने विषयमा समस्या रहेको बताए ।

बोर्लाङ-४ का विपिन श्रेष्ठले भने-'पहिलो किस्ताको रकम त पायौँ । अब बन्दै गरेको घर देखाएर दोस्रो किस्ता पाइन्छ कि पाइँदैन -' नयाँ बनेको घर सरकारले तोकेको मापदण्ड अनुसार भयो कि भएन भन्ने पनि आफूहरूलाई थाहा नभएको बोर्लाङ-४ का प्रेम श्रेष्ठले गुनासो गरे ।

photo20161121gorkha-1

सरकारले दिने भनिएको ३ लाख रुपियाँ अनुदानको रकमले नयाँ घर नबन्ने र सरकारले दिने ऋणको बारेमा समेत आफूहरूलाई केही थाहा नभएको भूकम्प पीडितहरूले गुनासो गरेका छन् । र्सार्वजनिक सुनुवाइ कार्यक्रममा लाभाग्राही सूचीमा नाम छुटेको भन्दै गुनासो फारम भरेकाहरूले आफूहरूको समस्याको सम्बोधन कहिले हुन्छ - भनेर प्रश्न राखेका थिए ।

शहरी विकास तथा भवन डिभिजन कार्यालयकी असिन्टेन्ट सव इन्जिनियर रविना खनालले भूकम्प पीडितहरूले सरकारले उपलब्ध गराएको १७ ओटा नक्साको अधारमा घर बनाउनुपर्ने बताइन् ।

कार्यक्रममा सहभागी बोर्लाङका गाविस सचिव मोहन दाहालले गाविसमा पुनर्निर्माणका लागि गाउँमा तीन जना प्राविधिकको टिम खटिएको जानकारी दिएका थिए ।

photo20161121gorkha-4

सहायक प्रमुख जिल्ला अधिकारी नेत्रप्रसाद शर्माले अनुदान रकम पाउन छुटेकाहरूले भरेको गुनासो सम्बोधन छिट्टै हुने बताए । 'सबै गुनासो इन्ट्रि गरेर सुझावसहित पुनर्निर्माण प्राधिकरणमा पठाएका छौँ ।'-शर्माले भने ।

बोर्लाङ गाविसका १ हजार ४ सय ६ जना भूकम्प पीडितहरूको लाभग्राही सूचीमा नाम छ ।  साथै गाविसका १ सय २७ भूकम्प पीडितहरूले आफ्नो नाम लाभग्राही सूचीमा समेट्न माग गर्दै गुनासो फर्म भरेका छन् ।

मानव अधिकार सञ्जालका अध्यक्ष यदु अधिकारीले जिल्लाभरका भूकम्प पीडित सुकुम्बासीहरूले घर कहाँ बनाउने भन्ने चिन्ता व्यक्त गरेको बताए ।

हरिराम उप्रेती