इन्सेक गतिविधिहरू

अनौपचारिक क्षेत्र सेवा केन्द्र (इन्सेक) मधेस प्रदेशद्वारा मिथिला नगरपालिका–२ नक्टाझिज स्थित श्री जनता माध्यमिक विद्यालयमा गठन गरिएको बाल अधिकार सचेतना समूहले मिथिला नगरपालिका–५ को रामलक्ष्मण चौकमा सडक नाटक प्रदर्शन गरेका छन् ।

वैशाख २६ गते राष्ट्रिय कानुन दिवसको अवसरमा स्थानीय समुदायलाई अधिकार र कर्तव्यप्रति सचेत पार्दै जिम्मेवार निकायलाई जवाफदेहि बनाउन सडक नाटक प्रदर्शन गरेको हो ।

सडक नाटक हेर्न मिथिला नगरपालिका–५ का वडाअध्यक्ष रामचन्द्र महतो, वडासचिव सत्यमान थिङ्ग लगायतको समेत उपस्थिति रहेको थियो । बाल अधिकार सचेतना समूह मधेस प्रदेश सचिव राज यादवले इन्सेक मधेस प्रदेशको सहयोगमा बाल अधिकार सचेतना समूहले प्रदर्शन गरेको सो सडक नाटक हेर्न उल्लेख्य स्थानीयहरूको भीड रहेको बताउनुभयो ।

नाटकमा जनता माध्यमिक विद्यालय नक्टाझिजका बाल अधिकार समूहका कलाकारहरू धमेन्द्र कुमार महतो, श्रवण यादव, जयप्रकाश महतो, ललित कुमार महतो, प्रिन्स कुमार सिंह, सुलोचना सिन्हा र सुजिता कुमारी महतो लगायतले समुदायमा सचेतनाका लागि अभिनय गरेका थिए ।

सडक नाटक प्रदर्शनको क्रममा कलाकारहरूले छोरीको शिक्षामा गरिने भेदभाव, शिक्षामा सबैको समान पहुँच, छुवाछुत, मानवीय उपचारमा हुने लापरवाही, वातावरणीय सरसफाइ, विभिन्न हिंसा तथा विसंगतिविरुद्ध अभिनय मार्फत समाजमा सचेतना जगाउन सन्देश प्रवाह गरेको इन्सेकका जिल्ला सहजकर्ता अनिता यादवले जानकारी दिनुभयो ।

यता सो सकड नाटक हेरेपछि मिथिला नगरपालिका–५ का वडाअध्यक्ष रामचन्द्र महतोले समाजमा व्याप्त रहेको विभिन्न भेदभाव्, छुवाछुत, छोरा छोरीको शिक्षामा अभिभावकद्वारा गरिने असमान व्यवहार, सरसफाइको अभावमा हुने असर लगायतको विषयलाई महत्वका साथ उठान गरेकोले समाजको आँखा खोल्न यस्ता सडक नाटक ठाउँ ठाउँमा गर्न आवश्यक रहेको बताउनुभयो ।

अजयकुमार साह