इन्सेक गतिविधिहरू

अनौपचारिक क्षेत्र सेवा केन्द्र (इन्सेक) मधेस प्रदेशको आयोजनामा शम्भुनाथ नगरपालिकास्थित रामदयाल माध्यमिक विद्यालयको बाल अधिकार सचेतना समूहले ०८० कात्तिक २० गते कार्ययोजना बैठक सम्पन्न गरेको छ ।

नवगठित बाल समूहले कार्ययोजना अनुसार कात्तिक २४ गते सडक नाटक प्रदर्शन गर्ने निर्णय गरेको छ । बाल विवाह, दाइजो प्रथा, महिला हिंसा न्यूनिकरणका निम्ति सडक नाटक प्रभावकारी हुने भन्दै निर्णय गरिएको संरक्षक शिक्षक अशोक कुमार साहले बताउनु भयो ।

सडक नाटक पछि समुदायमा बाल विवाह, दाइजो प्रथाबारे धारणा परिवर्तन हुने र नागरिक समाजमा सचेतना फैलिने विद्यार्थीहरूले विश्वास गरेका छन् । सामाजिक विकृतिविरुद्ध जनचेतना फैलाउन प्रभावकारीे बन्दै गएको सडक नाटकको माध्यमले समस्या समाधानका लागि आमजनतालाई जागृत गराउन सकिने समूहका अध्यक्ष जयप्रकाश दासले बताउनु भयो ।

छोराछोरीबीचको विभेद, बालविवाह, बालविवाहले स्वाथ्यमा पर्ने असर र पारिवारिक बोझ, बाल श्रम, महिला हिंसालगायत समस्याको न्यूनीकरणका लागि मैथिली भाषामा गरिने नाटक आम व्यक्तिलाई बुझ्न पनि सजिलो हुने शिक्षक हरीनारायण चौधरीले बताउनु भयो ।

बैठकको समन्वय गर्दै इन्सेक सप्तरी सहजकर्ता अजय परियारले इन्सेकको परियोजनाले गर्ने काम र उद्देश्य बारे प्रकाश पार्नु भयो ।

मनोहरकुमार पोखरेल