इन्सेक गतिविधिहरू

मायाँदेवी गाउँपालिका १ स्थित छत्रपाली तिर्था देवी माविमा इन्सेकद्वारा गठित बाल अधिकार चेतना समूहले विद्यालयका समस्या पहिचान गरी गाउँपालिकामा जेठ १४ गते ध्यानाकर्षण पत्र बुझाएको छ ।

बाल अधिकार समूहले समस्या पहिचान गरी गाउँपालिकाको शिक्षा युवा तथा खेलकुद शाखा, वडा कार्यालय र छत्रपाली तिर्थादेवी माविमा ध्यानाकर्षण पत्र बुझाएका हुन् ।

विद्यार्थीहरूकालागि कक्षा ९ र १० को ऐच्छिक गणित बिषयपुस्तक प्राप्त नभएको, पुस्तकालयमा प्रयाप्त पुस्तक नहुनु र भएका पुस्तकहरूको प्रयोग गर्न नपाउनु , विद्यालयमा  प्राथमिक उपचारको व्यवस्था नहुनु, शौचालयमा पानी तथा सरसफाई सम्बन्धी कुनै पनि सामाग्री नभएको , सेनेटरी प्याड  प्रयोग पश्चात व्यवस्थापन गर्ने स्थान नभएकोलगायतका समस्याहरू ध्यानाकर्षण पत्रमा उल्लेख गरिएका छन् ।

ध्यानाकर्षण पत्र बुझ्दै शिक्षा युवा तथा खेलकुद शाखा प्रमुख माधवप्रसाद घिमिरेले विद्यालय व्यवस्थापन समिती , गाउँपालिका प्रमुख प्रशासकीय अधिकृत र प्रधानाध्यापकसँग समन्वय गरी बाल अधिकार चेतना समूहले पेश गरेको ध्यानाकर्षण पत्र माथि छलफल गरी समाधान गर्ने प्रतिबद्धता व्यक्त गर्नुभयो ।

वडा अध्यक्ष ईसाहक मुसलमानले विद्यालय देखिएका समस्याहरूलाई समाधान गर्नतर्फ लाग्ने प्रतिबद्धता जनाउनु भयो ।

विद्यालयका प्रधानाध्यापक नरेन्द्रबहादुर कुर्मीले विद्यालयका विभिन्न समस्याहरू समाधान गर्न विद्यार्थीहरूको समेत सहयोग चाहिने बताउँदै बाल अधिकार चेतना समूहले गरेको मागहरू बिस्तारै समाधान हुने बताउनु भयो ।

पार्वती आचार्य