इन्सेक गतिविधिहरू

अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीको आयोजनामा सुदूरपश्चिम प्रदेशस्तरीय बाल अधिकर चेतना समूहको बैठक ०८१ असोज ७ गते धनगढीमा सम्पन्न भएको छ ।

इन्सेक सुदूरपश्चिम प्रदेश कार्यालय, धनगढीका प्रदेश संयोजक खडकराज जोशीले बाल अधिकार चेतना समूहका पदाधिकारीहरुले पठनपाठनका साथै अतिरिक्त क्रियाकलापमा सक्रिय हुन र अधिकारसँगै कर्तव्यको पनि पालना गर्नु पर्ने बताउनु भयो ।

बालबालिकाहरुले पढ्न पाउनु बाल अधिकार हो भने अनुशासित, लगनशिल र इमानदार भएर पढ्नु बालबालिकाको कर्तव्य रहेको उहाँले बताउनु भयो ।

इन्सेक सुदूरपश्चिम प्रदेश कार्यालय, धनगढीका कार्यक्रम संयोजक राजकुमार चौधरीले बाल अधिकार चेतना समुहका पदाधिकारीहरुले विद्यालयमा सञ्चालन गर्ने गतिविधिहरुलाई लिखित रुपमा निर्णय गरेर सञ्चालन गर्न आग्रह गर्नु भयो ।

बाल अधिकार चेतना समूहकी अध्यक्ष निसा सन्ज्यालले बाल अधिकार चेतना समूहले विद्यालयकोे नियमित सरसफाई र अतिरिक्त क्रियाकलाप गर्दै आइरहेको बताउनु भयो ।

बाल अधिकार चेतना समूहका उपाध्यक्ष अमित चौधरीले बाल अधिकार चेतना समूहको  पुनर्गठन सम्पन्न भएको बताउनु भयो ।

बाल अधिकार चेतना समूहका सदस्य कबिता सापकोटाले नयाँ शैक्षिक सत्रमा बालभित्ते पत्रिका प्रकाशनका लागि तयारी भइरहेको बताउनु भयो ।

बाल अधिकार चेतना समूहको प्रदेशस्तरीय बैठकमा कैलाली र कञ्चनपुर जिल्लाका आठ ओटा विद्यालयका बाल अधिकार चेतना समुहका पदाधिकारीहरुको सहभागिता रहेको थियो ।

मैनामोती चौधरी