इन्सेक गतिविधिहरू

इन्सेक मध्यमाञ्चल क्षेत्रीय कार्यालयको आयोजनामा क्षेत्रभित्र कार्यक्रम सञ्चालित विद्यालयका बालअधिकार चेतना समूहका पदाधिकारीहरूका लागि ०७३ माघ २७ देखि २९ गतेसम्म आयोजित क्षमता अभिवृद्धि तालिमको धुलिखेलमा सुरु गरिएको छ ।

तालिमको शुरुवात गर्दै इन्सेकका मध्यमाञ्चल क्षेत्रीय कार्यालयका संयोजक कृष्ण गौतमले तालिममा सिकेका कुरालाई व्यवहारमा उतार्न सुझाए । बालअधिकार चेतना समूहका पदाधिकारीहरूले बालबालिकाको हितमा धेरै काम गरेको स्मरण गराउँदै उनले तालिमपछि बाल अधिकार चेतना समूहहरूको सक्रियता बढ्नुपर्नेमा जोड दिए ।

तालिममा बाल अधिकार र कर्तव्य, बाल अधिकारको ऐतिहासिक पृष्ठभूमी, बाल अधिकारसम्बन्धी राष्ट्रिय तथा अन्तर्राष्ट्रिय कानुन, बाल दुर्व्यवहार र जोखिमपूर्ण श्रम, बालमैत्री विद्यालय र दण्डरहीत शिक्षा, विद्यालय तहमा बालअधिकार र मानवअधिकार शिक्षाको अवधारणा, बालभित्ते पत्रिका र यसको महत्व, कार्ययोजना निर्माणलगायतका विषयमा जानकारी दिइने छ ।

तालिममा दोलखा, सिन्धुपाल्चोक, धादिङका कार्यक्रम सञ्चालित गाउँका विद्यालयमा गठित बाल अधिकार चेतना समूहका पदाधिकारी, कार्यक्रम सहजकर्तालगायत ४३ जनाको सहभागिता रहेको छ ।

भोजराज तिमल्सिना