इन्सेक गतिविधिहरू

बलात्कार घटनाका पीडित १६ वर्षीया बालिकालाइ अनौपचारिक क्षेत्र सेवा केन्द्र (इन्सेक) ले ०८१ असोज १४ गते आर्थिक सहयोग प्रदान गरेको छ ।

राष्ट्रिय मानवअधिकार आयोग मधेस प्रदेशका प्रमुख बुद्धनारायण सहनी र इन्सेक मधेस प्रदेशका संयोजक राजु पासवानले संयुक्तरुपमा पीडितलाई १० हजार रुपियाँ चेक मार्फत हस्तान्तरण गर्नु भयो ।

पीडितलाई विष्णुपुर गाउँपालिका-३ का २३ वर्षीय कृष्ण सदाले ०८० चैत २७ गतेसम्म पटक पटक बलात्कार गरी गर्भवति बनाएको आरोपमा पीडित पक्षले जिल्ला प्रहरी कार्यालय सिरहामा साउन ६ गते उजुरी दिएको पीडित बालिकाकी आमाले बताउनु भयो । बालिकाको स्वास्थ्य परीक्षण प्रादेशिक अस्पताल सिरहामा साउन ६ गते भएको थियो ।

जिल्ला प्रहरी कार्यालय सिरहाका इन्स्पेक्टर दिपककुमार सिंहले उजुरी दर्तापश्चात आरोपित फरार रहेकोले खोज तलास गरिरहेको बताउनु भयो ।

इन्सेकका मधेस प्रदेश संयोजक राजु पासवानले पीडित बालिका बलात्कार पछि गर्भवती भई ०८१ असोज १२ गते सुत्केरी भई छोरीलाई जन्म दिएको र उनलाई बस्न, खान समस्या भएकोले सुत्केरी स्यहारको लागि आर्थिक सहयोग गरेको बताउनु भयो ।

दुर्गा परियार