इन्सेक गतिविधिहरू

अनौपचारिक क्षेत्र सेवा केन्द्र (इन्सेक) को आयोजनामा पारस्पारिक जवाफदेहिता परियोजनाको आयोजनामा चैत ५ गते उत्तरगया गाउँपालिका ४ मा गरिएको “विकासका लागि नागरिक समाज र सञ्चार जगतबीच सहकार्य” विषयका अन्तरक्रिया कार्यक्रममा प्रभावकारी विकासका लागि नागरिक समाज र सञ्चार जगतको सहकार्य आवश्यक हुने सरोकारवालाले बताएका छन् ।

कार्यक्रममा विकास निर्माण तथा अन्य कार्यमा हुने ढिलासुस्ती र अनियमितता रोक्न नागरिक समाज र सञ्चार जगतबीच सहकार्यले सम्भव रहेको सरोकारवालाहरुले बताएका हुन् ।

उत्तरगया गाउँपालिका ४ का युवप्रसाद न्यौपानेले यहाँ निर्माण भएको स्वास्थ्यचौकी भवन चाँडै जिर्ण भएको, सोलार, शौचालय, पानीको समस्या गरेको विषयमा ध्यान दिनुपर्ने बताए । स्थानीय सन्तोषी आचार्यले कृषिका समस्या र कृषकका सफलता पनि मिडियाले समेट्नु पर्ने बताइन् ।

सहभागी सुशील नगरकोटीले सञ्चार माध्यमले नकरात्मक विषय धेरै उठान गरेकोले सफलताका कुराहरु र प्रगति पनि समेट्नु पर्ने बताए ।

महिला अधिकारकर्मी मीठू वाइवाले मिडियाले विकास निर्माणमा पनि निगरानी राख्नु पर्ने बताउँदै उत्तरगया र कालिका गाउँपालिकामा बाँदर, बँदेल र दुम्सीको समस्याले खेतीबाली नष्ट गरेर हैरान परेको विषय मिडियाले उठाउनुपर्ने बताइन् । दिनुभर बाँदर त धपाउन सकिन्छ रातभर बँदेल र दुम्सीले खेतीबाली खाएर नष्ट गरिदिनाले यस क्षेत्रमा किसान हैरान भएको विषयमा गाउँपालिका र लाङटाङ राष्ट्रिय निकुञ्जमा निवेदन दिएपनि वास्ता नभएको उनले बताइन् ।

गैरसरकारी संस्था महासंघका रामशरण न्यौपानेले अनलाइन मिडिया छाडा भएको आरोप लगाए । उनले भने“सरकारी बजेट प्रति ध्यान नदिइकन धेरै गैरसरकारी संस्थाको बजेट प्रति नकारात्मक दृष्टिले हेरिएको छ । सरकारले पनि पारदर्शी हुनुपर्छ ।”

उत्तरगया गाउँपालिका ४ का वडा अध्यक्ष केशरबहादुर बुलुनले लक्षित वर्गको कार्यक्रम तयार गर्न लागेकोले प्रस्ताव पेश गर्न आग्रह गरे ।

हेमनाथ खतिवडा