इन्सेक गतिविधिहरू

अनौपचारिक क्षेत्र सेवा केन्द्र (इन्सेक) बागमती प्रदेशको आयोजनामा ०८० असार २८ गते प्रदेश स्तरीय मानव अधिकार र बाल अधिकार सचेतनाको बैठक मनहरीमा सम्पन्न गरेको छ ।

मनहरीमा भएको भेलाले बिमला गोपाली (मकवानपुर) संयोजक र खिलप्रसाद शर्मा (चितवन) सहसंयोजक रहेको पाँच सदस्यीय प्रदेशस्तरीय मानव अधिकार समूह गठन गरेको हो । समूहको सदस्यहरूमा चन्द्रमान प्रजा, सुजाता दमाई र उमेश राई रहेका छन् ।

यसैगरी सोही दिन बसेको बालबालिकाहरूको भेलाले वर्षा थापा (चितवन) सहसंयोजक रहेको ६ सदस्यीय प्रदेशस्तरीय बाल अधिकार समूह गठन गरेको छ । समूहको सदस्यहरूमा लक्ष्मी प्रजा, सजल गौतम, ललिता कोइराला, रुपा गर्तौला र सोनिया स्याङ्ताङ रहेका छन् ।

उक्त बैठकमा मानव अधिकारमैत्री समाज निर्माणका लागि बाल अधिकार समूह र मानव अधिकार समूहले शिक्षा, स्वास्थ्य, वातावरण र विभेदविरूद्धका हकहरूको संरक्षण र संर्वद्धन गर्दै स्थानीय तहमा मानव अधिकार शिक्षालाई प्रभावकारी बनाउने लक्ष्य राखेको इन्सेक बागमती प्रदेश कार्यालयका संयोजक गणेश भण्डारीले बताउनु भयो ।

स्थानीय स्तरमा मानव अधिकार समूह र बाल अधिकार समूहले पहिचान गरेका तर समाधान हुन नसकेका समस्याहरूलाई प्रदेशस्तरको मानव अधिकार समूह र बाल अधिकार सचेतना समूह मार्फत समाधानका लागी नेतृत्व लिन समूहका पदाधिकारी र सदस्यहरूलाई भण्डारीले अनुरोध गर्नु भयो ।

मानव अधिकार समूहका संयोजक बिमला गोपालीले प्रदेशस्तरमा भएका बालबालिका सवाललाई अभियानका रूपमा अघि बढाउन प्रदेशस्तरीय बालअधिकार सञ्जालनको गठन गरिएको बताउनु भयो ।

बाल अधिकार समूहका विद्यार्थीहरूले आफूहरूले बाल अधिकारसम्बन्धी तथा जातीय विभेद, लैङ्गिक विभेद, बालविवाह, चेलिबेटी बेचबिखन, घरेलु हिंसा जस्ता विषयमा जनचेतनामुलक नाटक प्रस्तुत गरेको र आउँदा दिनहरूमा पनि यस्ता खालका कार्यक्रमहरू गर्ने कुरा व्यक्त गर्नुभयो ।

स्थानीय तहमा रहेका बालबालिका सवाललाई प्रदेशस्तरमा जोड्नका लागि बाल अधिकार सञ्जालको गठन गरिएको मानव अधिकार समूहका सदस्य चन्द्रमान प्रजाले बताउनु भयो ।

इन्सेक बागमती प्रदेश कार्यालय, हेटौँडा