इन्सेक गतिविधिहरू

राष्ट्रिय पुनःनिर्माण प्राधिकरणले स्थायी आवास निर्माणका लागि लाभग्राहीलाई सहजीकरण र अनुगमनमा खटाएका प्राविधिक र इञ्जिनियरहरू गाउँमा नभएको गुनासो गरेका छन् । इन्सेकले ओखलढुङगामा जेठ २५ गते आयोजना गरेको सार्वजनिक सुनुवाइ कार्यक्रममा सहभागी भूकम्प पीडितहरूले यस्तो गुनासो गरेका हुन् ।

मानेभञ्ज्याङ गाउँपालिकामा आयोजना गरिएको 'भूकम्पपछिको पुनःनिर्माण र गाउँपालिकाले प्रवाह गरेको सेवा' विषयक सार्वजनिक सुनुवाइमा पीडितहरूले सवाल राख्दै गाउँमा प्राविधिक नबसेको, पशु सेवा कार्यालयले पीडित किसानहरूलाई पशु फार्म निर्माण गर्न दिइने अनुदान गैरपीडितले पाएको लगायतका गुनासा गरे ।

मानेभञ्ज्याङ गाउँपालिका-३ उवूँका शेरबहादुर राईले घर पुरै बनिसक्दा समेत प्राविधिक घर हेर्न नआएको गुनासो गरे । अर्का पीडित यानबहादुर मगरले वडा सचिवको लापरवाहीले अझै ३६ जना पीडितले पहिलो किस्ता रकम नपाएको गुनासो गरे । सम्झौतामा कोड नम्बर उल्टोपाल्टो परेकाले समस्या आएको वडा सचिव राजेन्द्र राजभण्डारीले जनकारी गराए ।

सार्वजनिक सुनुवाइमा गाउँपालिकास्तरका सरकारी कार्यालयका प्रमुख, गैरसरकारी संस्था, पत्रकार, भूकम्प पीडितहरू, राजनीतिक दलसहित ७६ जनाको सहभागिता थियो । कार्यक्रमको उद्देश्यका बारेमा जानकारी गराई पीडित र सरोकारवालाहरूलाई सवाल राख्न लगाइएको थियो भने सवालको जबाफ, जबाफदेही वक्ताहरूले दिएका थिए ।

शिवप्रसाद ढुङ्गाना