इन्सेक गतिविधिहरू

अनौपचारिक क्षेत्र सेवा केन्द्र (इन्सेक) पोखरा र नेपाल पत्रकार महासङ्घ कास्कीको संयुक्त आयोजनामा जेठ २६ गते पोखरामा पत्रकार र सुरक्षा विषयक बैठक सम्पन्न भएको छ ।

कास्की, लमजुङ, स्याङ्जा, तनहुँ र गोरखा जिल्लाका पत्रकार सहभागी उक्त बैठकमा पत्रकार बद्रीबिनोद प्रतिकले पत्रकारिता र पत्रकार सुरक्षा बारेको चासो विषयक कार्यपत्र समेत प्रस्तुत गरेका थिए ।

बैठकमा बोल्ने वक्ताहरूले पत्रकारहरूमाथि राजनीतिक दबाव हुनु, स्वतन्त्र भएर पत्रकारिता गर्ने व्यक्ति न्यून रहनु, विषयगत ज्ञानको अभाव र एक आपसमा पुर्वाग्रहको भावनालगायत विषयका कारण पत्रकारहरू कहिलेकाहीँ असुरक्षित बन्ने बताए ।

बैठकमा जेठ २ गते प्रहरीले गिरफ्तार गरेका गोरखाका पत्रकार विकास भट्टराईले निर्वाचन विरोधी गतिविधिमा आबद्ध नभएपनि प्रहरीले आफूलाई गिरफ्तार गरेर आठ दि पछि मात्रै रिहा गरेको बताए । गिरफ्तारीका क्रममा शारीरिक र मानसिक यातना नदिएको भएपनि झुठो आरोपमा आफूलाई गिरफ्तार गरिएको भट्टराईले गुनासो गरे ।

यस्तै स्याङ्जाकी पत्रकार प्रतीक्षा काफ्लेले जिल्लामा समाचार लेख्ने भन्दा पनि नलेख्ने पत्रकार धेरै भएको बताइन् । समाचार नलेख्ने तर महासङ्घको सदस्य धेरै भएको बताउँदै काफ्लेले पत्रकार विभिन्न खाले प्रलोभनमा समेत पर्ने सम्भावना धेरै हुँदा पत्रकारलाई पत्रकारबाट नै धेरै चुनौती रहेको बताइन् ।

बैठकमा बोल्दै नेपाल पत्रकार महासङ्घ तनहुँ शाखा उपाध्यक्ष सोनी खनियाले जिल्लामा लागु औषध र ठेक्का पट्टा जस्ता आर्थिक चलखेल हुने स्थानबाट पत्रकारलाई समाचार लेखेका कारण धम्की आउने गरेको बताइन् ।

राष्ट्रिय मानव अधिकार आयोगका पश्चिमाञ्चल क्षेत्रीय कार्यलय, पोखराका निर्देशक नितु गर्तौलाले पत्रकारको पेशागत सुरक्षाका लागि राष्ट्रिय मानव अधिकार आयोग सधैँ प्रतिबद्ध रहेको बताइन् । बैठकमा इन्सेक क्षेत्रीय कार्यलय पोखराका संयोजक शिव खकुरेलले पश्चिमाञ्चल क्षेत्रमा पत्रकारको पछिल्लो अवस्था समेटिएको एक सामाग्री प्रस्तुत गरेका थिए ।

इन्सेक पश्चिमाञ्चल क्षेत्रीय कार्यलय पोखरा