इन्सेक गतिविधिहरू

अनौपचारिक क्षेत्र सेवा केन्द्र (इन्सेक)को आयोजनामा पत्रकार र मानव अधिकारकर्मीहरूको साझेदारी बैठक पुस ६ गते मङ्गलसेनमा सम्पन्न गरिएको छ

मानव अधिकारको क्षेत्रमा काम गर्दा राजनीतिक, पारिवारिकका साथै सामाजिक समस्या रहेको बैठकमा सहभागी पत्रकार र मानव अधिकारकर्मीहरुले बताएका थिए ।

महिला अधिकारकर्मी विन्दु रावलले महिलाको न्यायको लागि लड्दा आफै असुरक्षित रहेको भनाइ राखिन् । जिल्लामा छाउपडी कुरीतिलगायत महिलामाथि हुने सबै प्रकारका हिंसाबाट महिलाहरू पीडित हुनु परेको अर्का महिला अधिकारकर्मी सरिता उपाध्यायको भनाइ छ ।

बैठकमा सहभागी अछाम जिल्लाका पत्रकार र मानव अधिकारकर्मीहरूले आगामी दिनमा सहकार्य गर्दै अघि बढ्नेमा एकमत भएका छन् ।

उक्त साझेदारी बैठकमा इन्सेक केन्द्रीय कार्यालयका वरिष्ठ अधिकृत सुशील चौधरीले नागरिक तथा राजनीतिक, आर्थिक, सांस्कृतिक अधिकार प्राप्तिका लागि अछाम जिल्लामा पत्रकार र मानव अधिकारकर्मीहरूले गर्न सक्ने कामका बारेमा भनाइ राखेका थिए ।

इन्सेक सुदूरपश्चिमाञ्चल क्षेत्रीय कार्यालयका संयोजक खडकराज जोशीले जानकारी दिँदै आगामी दिनमा पत्रकार र मानव अधिकारकर्मीहरूले मानव अधिकार उल्लङ्घन तथा ज्यादतीविरुद्धका मुद्दामा एकताबद्ध भएर अघि बढ्न सुझाव दिए ।

शिवराज ढुङ्गाना