इन्सेक गतिविधिहरू

न्यायिक प्रक्रियामा आउन नसकेका सबै प्रकारका घटनालाई नेपाल मानव अधिकार वर्षपुस्तकमा समेट्नु पर्ने एक कार्यक्रमका सहभागीहरूले जोड दिएका छन् ।

इन्सेक सुर्खेत जिल्ला प्रतिनिधि दुर्गा थापाका अनुसार वीरेन्द्रनगरमा आयोजित नेपाल मानव अधिकार वर्षपुस्तक-२०१७ का लागि सङ्कलन गरिएका घटनाका सम्बन्धमा आयोजित वार्षिक पूर्व समीक्षा कार्यक्रमका सहभागीहरूले सो कुरामा जोड दिएका हुन् ।

कार्यक्रममा सहभगीहरूले मानव अधिकारको संरक्षण सम्बर्द्धन गर्ने राज्यको प्रमुख कर्तव्य भएपनि यसमा सबै पक्षको सहयोगको आवश्यकतामा जोड दिएका छन् । उनीहरूले राष्ट्रिय तथा अन्तर्राष्ट्रिय स्तरमा उठ्ने गरेका सवाल तथा समस्याहरूले मानव अधिकारको संरक्षण र सम्बर्द्धनमा आघात पुर्‍याउने हुँदा यसतर्फ सबै पक्ष सचेत हुनुपर्नेमा जोड दिए ।

समीक्षा कार्यक्रमका सहभागीहरूले राखेका जिज्ञासाको जवाफ दिँदै इन्सेक मध्यपश्चिमाञ्चल क्षेत्रीय कार्यालय नेपालगञ्जका संयोजक भोला महतले राज्यले निर्माण गरेका कानुन, ऐन, नियम तथा अख्तियार गरेका नीति अनुरुप कार्यान्वयन भए नभएको बारेमा राज्यलार्इ सचेत बनाउन  इन्सेक लागि पर्दै आएको बताए ।

इन्सेकले आगामी दिनमा आर्थिक, सामाजिक तथा सांस्कृतिक अधिकारको क्षेत्रमा थप चनाखो भई लाग्ने बताउँदै संयोजक महतले नेपाल मानव अधिकार वर्षपुस्तक समग्र राष्ट्रको मानव अधिकारको दस्तावेज बन्न सफल भएको उल्लेख गरे ।

जिल्ला प्रशासन कार्यालय सुर्खेतका प्रशासकीय अधिकृत हितप्रसाद पौडेलले मानव अधिकारको पालना गर्ने र गराउने पक्षले आआफ्नो स्थानबाट इमान्दारिता देखाएमा मानव अधिकारको संरक्षण र सम्बर्द्धनमा टेवा पुग्ने उल्लेख गरे ।

कार्यक्रममा इन्सेक जिल्ला प्रतिनिधि दुर्गा थापाले प्रस्तुत गरेको प्रतिवेदन माथि छलफल गर्दै सहभागीहरूले इन्सेकले आगामी दिनमा जिल्लामा घट्ने जुनसुकै मानव अधिकार उल्लङ्घनका घटनालाई वर्षपुस्तमा समेटनुपर्ने सुझाव दिएका थिए ।

अनलाइन डेस्क