इन्सेक गतिविधिहरू

अनौपचारिक क्षेत्र सेवा केन्द्र (इन्सेक) पर्वतले नेपाल मानव अधिकार वर्ष पुस्तक-२०२० प्रकाशन पूर्व अर्धवार्षिक समीक्षा कार्यक्रम असार १० गते पर्वतमा सम्पन्न गरिएको छ ।

कार्यक्रममा जिल्ला समन्वय समिति पर्वतका प्रमुख मनोहर पौडेलले मानव अधिकार उल्लङ्घनमा नागरिकका पनि कमजोरी हुने गरेको बताए

पौडेलले पछिल्लो समयमा मानव अधिकारको संरक्षणमा राज्य जबाफदेही बन्दै आएको भएपनि नागरिकको लापरवाहीका कारण अपराधका घटनामा बृद्धि भएको बताए ।

इन्सेकले प्रकाशन गर्दै आएको मानव अधिकार वर्ष पुस्तक न्यायिक तथा अर्धन्यायिक क्षेत्रहरूका लागि मानव अधिकार घटना सर्वेक्षणमा प्रभावकारी बन्दै आएको बताउँदै उनले शिक्षा, खानेपानी, स्वास्थ्य, खाद्यान्नलगायतका क्षेत्रमा हुने मानव अधिकार हनन्का घटनाहरूलाई पनि जोड दिन सुझाव दिएका थिए ।

सहायक प्रमुख जिल्ला अधिकारी छवि सुवेदीले मानव अधिकार उल्लङ्घन नैतिक विषय र मानव अधिकारसम्बन्धी अपराध कानुनी विषय भएको बताउँदै राज्य सम्वेदनशील बन्दै आएको बताए ।

कार्यक्रममा इन्सेक पवर्पत जिल्ला प्रतिनिधि सन्तोष थापाले सन् २०१९ जनवरीदेखि हालसम्म गरी ६ महिनाको अवधिमा जिल्लामा अभिलेख गरिएका १४ ओटा घटना प्रस्तुत गरेका थिए ।

जसमध्ये घरेलु हिंसाका चार ओटा, यौन दुर्व्यवहारका चार ओटा, हत्याको एउटा, गिरफ्तारीका दुई ओटा, कुटपिटको एउटा, विष्फोटबाट क्षति एउटा र खाद्य सुरक्षासम्बन्धी एउटा घटना रहेका छन् ।

सन्तोष थापा