इन्सेक गतिविधिहरू

बागलुङ जिल्लाका प्रमुख जिल्ला अधिकारी लुकबहादुर क्षत्रीले इन्सेकले प्रकाशन गर्दै आएको नेपाल मानव अधिकार वर्ष पुस्तकले अन्र्तराष्ट्रिय स्तरमा नेपालको मानव अधिकारको अवस्थाको बारेमा जानकारी हुने हुँदा मानव अधिकारको अवस्था सुनिश्चत गराउन सबै लाग्नुपर्ने बताएका छन् ।

नेपाल मानव अधिकार वर्ष पुस्तक–२०२० का सङ्कलन गरिएका घटनाका सम्बन्धमा बागलुङमा आयोजना गरिएको अर्धवार्षिक समीक्षा कार्याक्रममा बोल्दै प्रजिअ क्षत्रीले यस्तो बताएका हुन् ।

उनले इन्सेककले वर्ष पुस्तक प्रकाशन पूर्व आयोजना गर्नै समीक्षा र त्यसपश्चात प्रकाशित पुस्तकले कार्यक्रमले समाजलाई सुरक्षित हुन, अपराध नियन्त्रण गर्न र हिंसा र गतल क्रियाकलापहरू रोक्नको लागि सहयोग गर्ने समेत बताए ।

क्षेत्रीले समाजमा हुने अपराध, हिंसा र हनन्का घटना नियन्त्रण र न्युनीकरण राज्य र अधिकारकर्मीकोे मात्र दायित्व नभएर समाजका सबै सभ्य नागरिकले दायित्वबोध गर्नुपर्ने बताए ।

कार्यक्रममा बोल्दै जिल्ला प्रहरी कार्यालय बागलुङका डिएसपी झविन्द्रप्रसाद भट्टराईले अपराध नियन्त्रण सँगै पीडितलाई न्याय र पीडकलाई कारवाहीको लागि आफूहरू सधैँ सचेत रहेको बताए ।

कार्यक्रममा बोल्दै उच्च अदालत बार एसोसिएशन बागलुङका अध्यक्ष हरी शर्माले सञ्चारकर्मी र मानव अधिकारकर्मीहरू सचेत बन्नुपर्ने बताए ।

उनले पुष्टी भएका घटनाहरूलाई मात्र सम्प्रेषण गर्नुपर्ने भन्दै भविष्यमा पुष्टी हुन नसक्ने घटनाहरू वर्तमानमा सार्वजनिक गरिदिँदा मनोवल कम हुने समेत बताए । उनले मानव अधिकार वर्ष पुस्तक रिसर्चको लागि राम्रो रिफरेन्स भएको भन्दै सबैले एकपटक अध्ययन गर्नुपर्ने बताए ।

कार्यक्रममा इन्सेक बागलुङले नेपाल मानव अधिकार वर्ष पुस्तक–२०२० को लागि प्रलेख गरेका ४६ ओटा घटनाहरू सार्वजनिक गरेको छ ।

बागलुङ जिल्लामा प्रलेख गरिएका ४६ ओटा घटनाहरूमा २१ ओटा घरेलु हिंसा, बलात्कार घटनाका सात, बलात्कार प्रयासका नौ ओटा, राजनीतिक अधिकारको एक, राज्यपक्षबाट धाकधम्की र कुटपिट एक, बाल अधिकार एक, जातीय विभेदको एक, बहुविवाहका तीन र महिला अधिकार तथा गोली प्रहार एक ओटा रहेका छन् ।

सिर्जना पन्त