इन्सेक गतिविधिहरू

अनौपचारिक क्षेत्र सेवा केन्द्र (इन्सेक) को आयोजनामा नेपाल मानव अधिकार वर्ष पुस्तक २०२० को प्रकाशन पूर्व अर्धवार्षिक समीक्षा कार्यक्रम असार ३ गते फुङलिङमा सम्पन्न भएको छ ।

०७५ पुस १७ गतेयता अभिलेख गरिएका मानव अधिकार उल्लङ्घन तथा ज्यादतीका घटनामा सबैभन्दा बढी बाल अधिकार विरूद्घ घटनाहरू रहेको उक्त कार्यक्रममा जानकारी दिइएको छ ।

इन्सेकले गरेको अभिलेखमा यो अवधिमा जिल्लामा १४ ओटा घटना छन् । जसमा तीन जना बालिका यौन दुर्व्यवहार घटनाबाट पीडित र एक जना बालिका बलात्कार घटनाबाट पीडित भएका छन् ।

एक जना महिला बलात्कार घटनाबाट पीडित भएको अभिलेख इन्सेकले गरेको छ । अन्यपक्षबाट गरिएको गोली प्रहारबाट एक जनाको मृत्यु भएको छ । त्यसैगरी ५ ओटा घरेलु हिंसाका घटना अभिलेख गरिएको छ ।

इन्सेक ताप्लेजुङ जिल्ला प्रतिनिधि देवराज गुरुङद्वारा प्रस्तुत जिल्लाको मानव अधिकार अवस्थाको प्रतिवेदनमा छलफल गर्दै सरोकारवालाहरूले महिला तथा बालबालिका विरूद्घमा हिंसा न्यूनीकरणमा राज्य कमजोर भएको बताएका छन् ।

समीक्षाका अवसरमा बोल्दै नेकपाका जिल्ला अध्यक्ष विजय किराँतले कुनैपनि बालक जन्म दर्ताबाट वञ्चित भएको अवस्थाप्रति सबैको ध्यान जान जरूरी भएको बताए ।

महिला उद्यमी सङ्घ सिदीङ्गमाका कार्यक्रम संयोजक किरण पौडेलले इन्सेकको भूमिका प्रभावकारी भएको र यसले मानव अधिकारका विषयलाई अभिलेखीकरण गरी राज्यलाई गुन लगाएको बताए ।

उनले सिदिङ्गमा गाउँपालिकामा धेरै बालबालिका जन्म दर्ताबाट वञ्चित भएकोप्रति ध्यानाकर्षण गराउँदै जन्मदर्ता पहलका लागि इन्सेकसँग आग्रह गरे ।

अधिकारकर्मी कुमार सिंवाले गाउँमा बालविवाहको अवस्था कहाली लाग्दो पाइएको बताउँदै यसतर्फ जनचेतनामुलक कार्यक्रमको खाँचो औँल्याए ।

जिल्ला अदालतका श्रेस्तेदार केदार गौतमले अदालतमा पारपाचुके मुद्दाको तथ्याङ्कमा २० वर्ष मुनिका उमेरका जोडी पनि पाइएको बताए ।

देवराज गुरुङ