इन्सेक गतिविधिहरू

भक्तपुर जिल्लमा २०१८ जनवारीदेखि नोभेम्बरसम्म ११ महिनाको अवधिमा घटना सार्वजनिक गर्दै  समीक्षा कार्यक्रम सम्पन्न गरिएको छ ।

मङ्सिर ११ गते भक्तपुरमा अनौपचारिक क्षेत्र सेवा केन्द्र (इन्सेक)ले आयोजना गरेको नेपाल मनव अधिकार वर्ष पुस्तक २०१९ को प्रकाशन पूर्व वार्षिक समीक्षा कार्यक्रममा घटनाहरू सार्वजनिक गरिएको हो ।

सार्वजनिक तथ्याङ्क अनुसार ११ महिनाको अवधिमा बलात्कारका घटनामा २६ जना पीडित भए । बलात्कार प्रयास तथा यौन दुर्व्यवहारका घटनामा तीन जना महिला र बाल यौन दुर्व्यवहारका कारण  एक बालिका पीडित भएकी छन् ।

यो अवधिमा राज्यतर्फबाट दुई जनासहित ६ जनाको हत्या, बहुविवाहको घटनामा नौ जना पीडित भए ।

कार्यक्रममा जिल्ला समन्वय समितिकी उपप्रमुख सरिता कुँवरले धेरै जसो घटनामा लागूपदार्थ सेवनकर्ताको संलग्नता पाइएको बताउँदै गलत सङ्गतले पनि उमेर नपुगेका बालबालिका तथा किशोरकिशोरीहरू दुव्र्यसनमा लाग्ने गरेकाले अपराध बढेको बताइन् ।

सूर्यविनायक नगरपालिकाकी उपप्रमुख जुना बस्नेतले महिला हिंसा मात्रै नभई पछिल्लो समयमा पुरूष हिंसा पनि बढ्दै गएको पाइएको बताइन् ।

नगरपालिकाको न्यायिक समितिमा रहेर काम गर्दा लैङ्गिक हिंसा बढेको पाइएको बताउँदै गत फागुनदेखि नगरपालिकामा ६० ओटा मुद्दा आएकोमा २५ ओटा मुद्दा मिलाएर पठाएको र नमिलेको मुद्दा अदालत पठाइएको बताइन् ।

उनले भनिन्–“बलात्कार तथा यौन दुर्व्यवहारका घट्नामा ५२ प्रतिशत छिमेकी, ८ प्रतिशत आफन्त, ३ प्रतिशत साथीहरूबाट भएको पाइएको छ । यसलाई रोक्न कक्षा ८ पढ्नेदेखि १२ सम्म पढ्ने विद्यार्थी र अभिभावकलाई जनचेतना जगाउनु आवश्यक छ ।”

हिंसा र अपराधलाई रोक्न नगरपालिकाले विशेष कार्यक्रम सञ्चालन गर्न कार्यक्रम ल्याउने तयारी गरेको बताउँदै उनले अब सामाजिक सङ्घसंस्था, सहकारी, टोलसुधार समितिले जनचेतनामूलक काम गर्नुपर्नेमा जोड दिइन् ।

कार्यक्रममा महानगरीय प्रहरी परिसर भक्तपुरका डिएसपी रेवतीरमण पोखरेलले भक्तपुरमा पनि बलात्कार भयावह अवस्थामा रहेको बताए । भक्तपुरमा प्रत्येक महिना दुईजना बलात्कारका घटनाबाट पीडित भएको अवस्था रहेको औँल्याए । यस्ता घटना रोक्न प्रहरी मात्रै नभई आमनागरिकले सहयोग गर्नुपर्नेमा जोड दिए ।

त्यस्तै गैरसरकारी संस्था महासङ्घ भक्तपुरका अध्यक्ष सोम शर्मा बजगाईले अपराधका घटना महत्वपूर्ण नभई, कारण महत्वपूर्ण भएकाले कारणलाई नियन्त्रण गर्ने बाटोमा जनप्रतिनिधिले सचेतना जगाउने र प्रहरी प्रशासनले कारबाहीको दायरमा ल्याउने काम गर्नुपर्नेमा जोड दिए ।

सामाजिक सञ्जालका कारण र फितलो कारबाही नीतिका कारण अपराधका घटना बढेको बताउदै उनले सहमतिमा सम्बन्ध राख्ने र सहमति बिग्रिएपछि बलात्कारको अभियोग लगाउने प्रवृत्ति बढेको औँल्याए ।

नेपाल पत्रकार महासङ्घ भक्तपुरका अध्यक्ष पुष्करराज बुढाथोकीले महिला हिंसाका घटना बढ्नु दुर्भाग्य भएको बताउँदै यसलाई रोक्न सबै लाग्नु पर्नेमा जोड दिए ।

सविना केसी