नेपाल मानव अधिकार वर्ष पुस्तक २०२४ को पूर्व वार्षिक समीक्षा सम्पन्न

  ०८० मङ्सिर २४ गते

नेपाल मानव अधिकार वर्ष पुस्तक २०२४ प्रकाशन पूर्व रामेछापको मन्थलीमा वार्षिक समीक्षा कार्यक्रम ०८० मङ्सिर २४ गते सम्पन्न भएको छ ।

कार्यक्रममा इन्सेक रामेछाप जिल्ला प्रतिनिधिले सन् २०२३ मा सङ्कलन भएका मानव अधिकार उल्लङ्घनका घटनाहरू प्रस्तुत गर्नु भएको थियो ।

कार्यक्रममा इन्सेकका जिल्ला प्रतिनिधिले सन् २०२३ मा रामेछापमा इन्सेकले सङ्कलन गरेका घटना बारे जानकारी गराउनुभएको थियो । उहाँले रामेछापमा यस वर्ष २८ ओटा घटना सङ्कलन भएकामा बलात्कारका घटना धेरै भएका जानकारी दिनुभयो । उहाँले हत्याको एक ओटा, कुटपिटका चार ओटा, धम्कीका दुई ओटा, जेलमा मृत्युका दुई ओटा, बाल यौन दुर्व्यवहारको एक ओटा, बालिका बलात्कारको ६ ओटा, घरेलु हिंसाका चार ओटा, बलात्कारका चार ओटा लगायतका घटना इन्सेकले अभिलेखीकरण गरेको जानकारी दिनुभयो ।

कार्यक्रममा बोल्दै जिल्ला समन्वय समिति रामेछापकी प्रमुख चिना खड्काले मानव अधिकारको विषय सबैको साझा सरोकारको विषय भएको बताउनु भयो ।

जिल्ला समन्वय समिति रामेछापका उपप्रमुख प्रेम सागर थापाले मानव अधिकार संरक्षणका लागि मानव अधिकार संस्थालाई सचेतनाका अभियान सञ्चालन गर्न सुझाव दिनुभयो ।

मन्थली नगरपालिका प्रमुख लब श्रेष्ठले मानव अधिकारको संरक्षणको लागि हरेक व्यक्ति घरबाटै लाग्नु पर्ने बताउनु भयो ।

प्रमुख जिल्ला अधिकारी अनिता निरौलाले मानव अधिकारको विषय व्यापक भएको बताउनु भयो । व्यक्ति व्यक्ति सुध्रिए मात्र मानव अधिकार संरक्षण हुने बताउनु भयो ।

जिल्ला प्रहरी कार्यालय रामेछापका प्रमुख डिएसपी होमबहादुर पराजुलीले मानव अधिकारको हिसाबले रामेछापको अवस्था सामान्य रहेको बताउनु भयो । तर बलात्कार र आत्महत्याका घटना नियन्त्रणमा भने सबैको ध्यान जानु पर्ने उहाँले बताउनु भयो ।

Photo_080-8-24_Ramechhap

Photo_080-8-24_Ramechhap1

Photo_080-8-24_Ramechhap3

Photo_080-8-24_Ramechhap2

नवराज घिमिरे