नेपाल मानव अधिकार वर्ष पुस्तकको पूर्व समीक्षा सम्पन्न

अनौपचारिक क्षेत्र सेवा केन्द्र (इन्सेक) बागलुङको आयोजनामा नेपाल मानव अधिकार वर्ष पुस्तक २०१९ का लागि सङ्कलन गरिएका घटनाहरूको प्रकाशन पूर्व वार्षिक समीक्षा कार्यक्रम मङ्सिर ३ गते सम्पन्न गरिएको छ ।

कार्यक्रममा प्रमुख जिल्ला अधिकारी वेदप्रसाद खरेलले भुगोल क्षेत्र अनुसार मानव अधिकारको आवश्यकता र परिभाषा फरक हुने भन्दै इन्सेकले देशव्यापी रूपमा गरिरहेको मानव अधिकारको अनुगमन र प्रलेख कार्य उदाहारणीय भएको बताए ।

Photo20181119Baglung3

प्रमुख जिल्ला अधिकारी खरेलले पछिल्लो समय मानव अधिकारको नारा गास, बास र कपासबाट माथि उठेर आफ्नो शरीर आफ्नो अधिकारसम्म पुगेको भन्दै इन्सेकले आफ्ना कार्यक्रम र गतिविधिहरूमा पनि परिर्वतन गर्नुपर्ने सुझाव दिए ।

उच्च अदालत, बार इकाई बागलुङका अध्यक्ष केशवराज पराजुलीले पछिल्लो समयमा बलात्कारजन्य घटना बढी देखिन थालेको प्रति चिन्ता व्यक्त गर्दै अपराधिक गतिविधिको गाम्भिर्यतालाई मध्यनजर गरेर बाहिर ल्याउनुपर्ने बताए ।

Photo20181119Baglung2

समीक्षा कार्यक्रममा इन्सेक जिल्ला प्रतिनिधि सिर्जना पन्तले गत पुस १७ गतेदेखि यहि मङ्सिर १ गतेसम्म सङ्कलन गरेका ५७ ओटा मानव अधिकार उल्लङ्घन तथा ज्यादतीका घटनाहरू प्रस्तुत गरेकी थिइन् ।

झण्डै एक वर्षको अवधिमा घरेलु हिंसाका ३९, बलात्कारका ६, बलात्कार प्रयासका नौ र बहुविवाहका तीनओटा घटना इन्सेकले अभिलेख गरेको छ । बलात्कार र बलात्कार प्रयासका घटनामा पीडित १५ जना मध्ये नौ जना बालिका रहेको प्रस्तुत प्रतिवेदनमा उल्लेख  छ ।

सिर्जना पन्त