इन्सेक गतिविधिहरू

नेपाल मानव अधिकार वर्ष पुस्तक–२०१९ को प्रकाशन पुर्व समीक्षा कार्यक्रम कात्तिक २८ गते जिल्ला सदरमुकाम चैनपुरमा सम्पन्न गरिएको छ ।

कार्यक्रममा इन्सेक जिल्ला प्रतिनिधि रमेश केसीले सन् २०१८ को जनवरीदेखि हालसम्म सङ्कलन गरेका मानव अधिकार उल्लङ्घन तथा ज्यादतीका २१ ओटा घटना प्रस्तुत गरेका थिए । जसमा महिला हिंसा, बलात्कार, बलात्कारको प्रयास, घरेलु हिंसा, कुटपिट र गालीगलौजका घटना रहेका छन् ।

जिल्ला समन्वय समितिका संयोजक खडकबहादुर खडकाले स्थानीय सरकारलाई मानव अधिकार संरक्षणका लागि चुनौती भएको भन्दै इन्सेकले मानव अधिकार उल्लङ्घन तथा ज्यादतीका घटनाहरू सङ्कलन गरेर सबै पक्षलाई सचेत गराउँदै आएको बताए ।

कानुनमा सबैको पहुँच नपुगुञ्जेलसम्म मानव अधिकारको प्रत्याभूति गर्न नसकिने भन्दै उनले व्यक्ति मात्र नभई सबै पक्षले यस विषयमा सजग हुनु पर्नेमा जोड दिए ।

अधिकाँश घटनाहरू स्थानीय सरकारको न्यायिक समितिलाई हेर्ने अधिकार भएको भए पनि न्याय पाइन्छ भन्ने विश्वासको अभावका कारण पीडित पक्ष जिल्लासम्म पुग्ने गरेको महिला अधिकारकर्मी सिता सिंहले बताइन् ।

जिल्लामा महिलासँग सम्बन्धित घटना बढी मात्रामा भएको भन्दै अधिकारकर्मी सिंहले कुनै पनि घटनालाई सामान्य रूपमा लिन नहुने र मानव अधिकारको विषयमा सबै सम्वेदनशील हुनु पर्ने बताइन् ।

जयपृथ्वी नगरपालिका प्रमुख विरेन्द्र खडकाले लामो समयदेखि इन्सेकले मानव अधिकार वर्ष पुस्तकमा मानव अधिकार उल्लङ्घनका घटनाहरू प्रकाशित गर्दै आएकोमा धन्यवाद दिँदै मानव अधिकार उल्लङ्घनका घटनाहरूमा कमी ल्याउन स्थानीय जनप्रतिनिधिहरूले महत्वपुर्ण भूमिका खेल्नु पर्ने बताए ।

रमेश केसी