इन्सेक गतिविधिहरू

अनौपचारिक क्षेत्र सेवा केन्द्र (इन्सेक) पाल्पाको आयोजनामा नेपाल मानव अधिकार वर्ष पुस्तक-२०१८ का लागि सङ्कलित घटनाको प्रकाशन पूर्व समीक्षा कार्यक्रम पुस १ गते तानसेनमा सम्पन्न भएको छ ।

कार्यक्रममा सन २०१७ को जनवरीदेखि हालसम्म सङ्कलन गरिएका मानव अधिकार उल्लङ्घन तथा ज्यादतीका घटनाको प्रतिवेदन प्रस्तुत गरिएको थियो ।

कार्यक्रममा जिल्ला समन्वय समिति पाल्पाका प्रमुख दयाराज बस्यालले इन्सेकले हरेक घटनाहरूलाई सुक्ष्म रूपमा लिई अध्ययन गर्दै आएको र यसले राज्यका निकायहरूलाई समेत सहयोग मिलेको बताए ।

उनले इन्सेकले बाहिर ल्याएर समस्याहरूलाई समाधान गर्न राज्यका निकायहरूले समेत सक्रियता देखाउँदै आएको बताए । प्रमुख बस्यालले जिल्लाका कतिपय स्थानमा अहिले पनि बिपन्न समुदायका बालबालिकाहरू अध्ययनबाट वञ्चित भएको भन्दै यस्ता विषयहरूको खोजी गरी सम्बन्धित निकाय सामु ल्याउन इन्सेकलाई आग्रह समेत गरे ।

सहायक प्रमुख जिल्ला अधिकारी ध्रुवबहादुर कुँवरले मानव अधिकार उल्लङ्घनको घटनालाई अभिलेखीकरण गर्ने कार्य अत्यन्तै चुनौतिपूर्ण रहेको भन्दै इन्सेकले घटनाको अभिलेखीकरणमा निरन्तरता दिएकोमा धन्यवाद दिए ।

उनले पाल्पा कारागारमा ल्याण्डलाइन फोन जडान, बिचल्लीमा परेका दुई जना बोटे बालबालिकाहरूको शिक्षा र अपाङ्गता भएका व्यक्तिको परिचयपत्र बनाउने कार्यलगायतमा इन्सेक र मानव अधिकार निगरानी समूहले गरेको पहल सराहनीय रहेको बताए ।

कार्यक्रममा इन्सेक पाल्पा जिल्ला प्रतिनिधि यज्ञमूर्ति तिमिल्सिनाले यो वर्ष सङ्कलन गरिएका ६७ ओटा घटनाहरू प्रकाशन पूर्व समीक्षाका लागि प्रस्तुत गरेका थिए ।

उनले कारागारका आश्रति बालबालिकाले क/ख समेत सिक्न नपाएको, पुरूष बन्दी गृहको निर्माण ढिलाइले बन्दीले जोखिम मोल्नुपरेको, शिक्षा, स्वास्थ्य र खाद्य अधिकारका सवालमा जनताले पूर्ण उपयोग गर्न नपाएको लगायतका विषय प्रस्तुत गरेका थिए ।

अनलाइन डेस्क