नेपाल मानव अधिकार वर्ष पुस्तक २०२० प्रकाशन पुर्व वार्षिक समीक्षा कार्यक्रम सम्पन्न

  ०७६ पुस ९ गते

नेपाल मानव अधिकार वर्ष पुस्तक २०२० का लागि अनौपचारिक क्षेत्र सेवा केन्द्र (इन्सेक) सर्लाहीको आयोजनामा जिल्लामा सङ्कलित घटनाहरूको पुष्टि तथा पुनर्पुष्टिका लागि वार्षिक पूर्व समीक्षा कार्यक्रम पुस ९ गते मलङ्गवामा सम्पन्न भएको छ ।

जिल्लामा ६२ ओटा मानव अधिकार उल्लङ्घन तथा ज्यादतीका घटना सन् २०१९ मा सङ्कलन गरिएको इन्सेक जिल्ला प्रतिनिधि बुधन साहले बताउनुभयो ।

सङ्कलित घटनामध्ये यो अवधिमा महिला र बालबालिका हिंसाका घटनामा १२ जना पीडित भएको प्रस्तुत प्रतिवेदनमा उल्लेख छ ।

एक वर्षको अवधिमा जिल्लामा राज्य पक्षबाट दुई जनाको हत्या र अन्य पक्षबाट १४ गरी १६ जनाको हत्या भएको प्रतिवेदनमा उल्लेख गरिएको छ ।

जसमा प्रहरीको गोली प्रहारबाट दुई जनाको हत्या भएको छ भने परिवारजनबाट ६ जना, अन्य पक्षबाट दुई जना र अज्ञातबाट ६ जनाको हत्या भयो ।

सन् २०१९ मै दुई बालक अपहरण घटनामा पीडित भए । त्यस्तै कुटपिट घटनामा आठ जना पीडित भएको प्रतिवेदनमा उल्लेख छ ।

कार्यक्रममा प्रमुख जिल्ला अधिकारी मोहनबहादुर जिसीले मानव अधिकारको क्षेत्रलाई व्यापक बनाउनु पर्ने उल्लेख गर्नु हुँदै घटनाको सत्य तथ्य बाहिर ल्याउन सकिए पीडितले न्याय पाउने बताउनु भयो ।

जिल्ला समन्वय समितिका सभापति मेथुर चौधरीले वैदेशिक रोजगारले गर्दा महिला हिंसा बढेको बताउनु भयो । यस्ता महिला हिंसाका घटनाको अनुसान्धान हुनु पर्नेमा उहाँले जोड दिनु भयो ।

जिल्ला प्रहरी कार्यालयका डिएसपी प्रतितसिंह राठौरले प्रहरीमा आएका कतिपय घटनाको अनुसन्धान चाँडै हुने गरेको भएपनि कतिपय घटनाहरुको अनुसन्धानमा समय लाग्ने गरेको बताउनु भयो ।

बुधन साह